Can Efesoy
23 Октомври 2025•Ажурирај: 24 Октомври 2025
АНКАРА (АА) - Петнаесет земји, вклучувајќи ја и Турција, Арапската лига и Организацијата за исламска соработка (ОИС), изразија најсилна осуда на одобрувањето од страна на Израел на два закона со кои се воведува т.н. „израелски суверенитет“ над Западниот Брег, известува Анадолу.
Во заедничко писмено соопштение, Турција, Саудиска Арабија, Јордан, Индонезија, Пакистан, Џибути, Оман, Гамбија, Палестина, Катар, Кувајт, Либија, Малезија, Египет, Нигерија, Арапската лига и ОИС го осудија одобрувањето од страна на Израел на два закона со кои се воведува т.н. „суверенитет“ над окупираниот Западен Брег и нелегалните еврејски населби.
Во соопштението се вели:
„На најсилен можен начин се осудува одобрувањето од страна на израелскиот парламент на двата предлог-закона насочени кон наметнување т.н. „израелски суверенитет“ над окупираниот Западен Брег и израелските нелегални еврејски населби како јасно кршење на меѓународното право, а особено на резолуцијата 2334 на Советов за безбедност на Обединетите нации (СБОН), која ги осудува сите израелски практики насочени кон промена на демографската структура, карактерот и статусот на окупираните палестински територии од 1967 година навака, вклучително и Источен Ерусалим, како и советодавното мислење на Меѓународниот суд на правдата (МСП), кое ја потврди нелегалноста на израелската окупација на палестинските територии и невалидноста на мерките за изградба на населби и анексија на Западниот Брег. Страните, уште еднаш потврдуваат дека Израел нема суверенитет над окупираните палестински територии.“
Поздравувајќи го Советодавното мислење на МСП за обврските на Израел на окупираната палестинска територија и сродните прашања објавено вчера, во соопштението се наведува:
„Со ова советодавно мислење, Судот ја потврди обврската на Израел, според меѓународното хуманитарно право, да ги обезбеди основните потреби за секојдневниот живот на луѓето што живеат на окупираната палестинска територија, вклучително и Газа, и да ги мобилизира сите расположиви средства, вклучително и активностите за помош што се спроведуваат преку Обединетите нации и нејзините агенции, особено Агенцијата на Обединетите нации за помош и работа за палестинските бегалци на Блискиот Исток (УНРВА), за да дозволи и олесни таквата помош.“
Во соопштението се наведува дека МСП, разгледувајќи ја опструкцијата на Израел за помошта наменета за Појасот Газа, ја повтори „обврската да се придржува кон забраната за користење на изгладување како метод на војување“. Исто така, се нагласува дека Судот ја повторил забраната за масовно присилно раселување и протерување, што вклучува наметнување непогодни услови за живеење.
МСП го потврдил „правото на палестинскиот народ на самоопределување и воспоставување независна држава“ и дека територијалните претензии на Израел врз Источен Ерусалим се прогласени за „ништовни и неважечки“ од страна на Советот за безбедност на ОН. Се истакнува дека во тој контекст се споменува и „Законот за престанок на активностите на УНРВА на територијата на државата Израел“, кој требаше да се спроведе и во Источен Ерусалим.
„Страните предупредуваат на продолжувањето на Израел со своите еднострани и нелегални политики и практики и ја повикуваат меѓународната заедница да ги преземе своите законски и морални одговорности и да го принуди Израел да престане со својата опасна ескалација и незаконски дејствија на окупираните палестински територии“, се вели во соопштението.
Се нагласува дека поддршката на легитимното право на палестинскиот народ да воспостави независна и суверена држава врз основа на границите од 4 јуни 1967 година, со Источен Ерусалим како главен град, е единствениот начин да се постигне праведен и сеопфатен мир во регионот и да се осигура безбедност и стабилност.
