Шефот на НАТО: Русија и Кина не смее да добијат пристап до економијата и воената инфраструктура на Гренланд

БРИСЕЛ (АА) - Генералниот секретар на НАТО, Марк Руте, денес нагласи дека алијансата ќе преземе чекори за да ги спречи Русија и Кина да добијат пристап до економијата или воената инфраструктура на Гренланд, јавува Анадолу.

Говорејќи на маргините на настанот „Украински појадок“ за време на Светскиот економски форум во Давос, Руте ја истакна стратегиската важност на Арктикот и Гренланд во контекст на безбедноста на НАТО.

„Кога станува збор за Гренланд, ќе се погрижиме Кинезите и Русите да не добијат пристап до економијата на Гренланд или до Гренланд во воена смисла, а тоа ќе биде дискусија што ќе се продолжи врз основа на она што веќе се случи минатата среда кога американскиот државен секретар Марко Рубио и потпретседателот Џ.Д. Венс разговараа со данската делегација“, рече тој.

Руте нагласи дека заштитата на Гренланд е дел од пошироката стратегија на НАТО за заштита на Далечниот Север.

Седумте арктички земји - САД, Канада, Данска, Исланд, Шведска, Финска и Норвешка - мора да работат заеднички за да го заштитат регионот од руско и кинеско влијание.

„Секако, сето ова не е за Гренланд или Арктикот. Првенствено станува збор за тоа како може да се заштитиме од нашите противници. Наш главен противник е Русија, а, секако, гледаме дека Кина масовно се гради“, рече тој.

Руте и Трамп се состанаа вчера на маргините на Светскиот економски форум во услови на неодамнешните тензии меѓу Европа и САД околу Гренланд.

Портпаролката на НАТО, Алисон Харт, ја опиша средбата како „многу продуктивна“.

Вчера Трамп на својата платформа Truth Social изјави дека по состанокот со Руте во Давос, Швајцарија, е воспоставена рамка за договор што ги вклучува Гренланд и поширокиот арктички регион.

„Врз основа на ова разбирање нема да ги воведувам царините што требаше да стапат на сила на 1 февруари“, додаде тој.

Минатата недела Трамп рече дека Вашингтон ќе воведе царини од 10 % за стоки од Данска, Норвешка, Шведска, Франција, Германија, Велика Британија, Холандија и Финска почнувајќи од 1 февруари и ќе ги зголеми на 25% во јуни, освен ако не се постигне договор за она што тој го нарече „целосно купување на Гренланд“ од страна на САД.

Европските лидери ги отфрлија заканите на Трамп против осумте европски земји, повторувајќи ја солидарноста со Данска и ветувајќи колективна акција.

Гренланд го привлече вниманието на Трамп поради неговата стратегиска арктичка позиција, обемните минерални ресурси и наводната загриженост за растечкото руско и кинеско присуство.

Данска и Гренланд ги отфрлија предлозите за продажба на територијата, потврдувајќи го данскиот суверенитет над островот.