Michael Gabriel Hernandez
19 Ноември 2025•Ажурирај: 19 Ноември 2025
ВАШИНГТОН (АА) – Американскиот претседател Доналд Трамп синоќа соопшти дека САД ги унапредуваат односите со Саудиска Арабија, официјално прогласувајќи го кралството за голем сојузник надвор од НАТО, јавува Анадолу.
„Со задоволство објавувам дека нашата воена соработка ја носиме на уште повисоко ниво со тоа што формално ја прогласуваме Саудиска Арабија за голем сојузник надвор од НАТО, што е многу важно за нив“, изјави Трамп за време на свечената вечера во Белата куќа со саудискиот престолонаследник Мухамед бин Селман.
„Ова го кажувам првпат бидејќи сакаа да остане мала тајна за вечерва. Тоа е уште една точка што ја освоивте денес, заедно со потпишувањето на историскиот стратегиски одбранбен договор што го финализиравме пред кратко време. Честитки“, додаде Трамп.
Статусот „голем сојузник надвор од НАТО“ им овозможува на земјите пристап до специјални привилегии во областа на одбранбената трговија и безбедносната соработка со САД, меѓу кои учество во заеднички истражувачки и развојни програми со Пентагон, како и преференцијален пристап до американско оружје, обука и заеми.
Меѓу другите земји со ваков статус се Бахреин, Колумбија, Египет, Израел, Јапонија, Кенија, Пакистан, Катар, Јужна Кореја и Тунис.
Оваа ознака, сама по себе, не дава формални безбедносни гаранции, но Белата куќа претходно соопшти дека Трамп и Бин Селман потпишале стратегиски одбранбен договор што „го зајакнува повеќе од 80-годишното партнерство во одбраната и ја засилува способноста за одвраќање низ Блискиот Исток“.
Не е јасно дали споменатата способност за одвраќање вклучува гаранција за американска одбрана на Саудиска Арабија доколку биде нападната. Белата куќа не одговори веднаш на барањето коментар за ова прашање.
