Русија вели дека ќе ги продолжи нуклеарните тестирања ако другите земји го сторат тоа

Русија ќе спроведе нуклеарни тестирања ако другите земји го сторат тоа, изјави денес шефот на Советот за безбедност, Сергеј Шојгу, еден ден откако американскиот претседател Доналд Трамп ѝ нареди на американската војска да го рестартира процесот на тестирање на нуклеарно оружје по прекин од 33 години, јавува Анадолу.

„Рускиот претседател Владимир Владимирович Путин, врховниот командант, одговори на ова. Ако тие почнат со тестирање, тогаш секако и ние ќе го сториме тоа“, изјави Шојгу за новинарите во Москва.

„Не гледам ништо ново тука, ова е адекватен одговор. Ако тие не го одржат, нема и ние да го одржиме“, додаде тој.

Вчера Трамп изјави дека му наредил на Министерството за одбрана „веднаш“ да започне со тестирање на нуклеарното оружје.

„Поради тестирањето на програми од страна на други земји, му наложив на Министерството за војна да започне со тестирање на нашето нуклеарно оружје на рамноправна основа. Тој процес ќе започне веднаш“, напиша тој на својата платформа „Truth Socia“, осврнувајќи се на ребрендираното име на Министерството.

Претходно, Кремљ соопшти дека Русија, која овој месец тестираше нова крстосувачка ракета на нуклеарен погон и ново автономно торпедо на нуклеарен погон, не тестирала вистинско нуклеарно оружје.