„Посилна Европска унија значи посилен НАТО“

БРИСЕЛ

Генералниот секретар на НАТО, Јенс Столтенберг денес изјави дека соработката на ЕУ и НАТО во текот на изминатите години била издигната на невидено ниво, јавува Агенција Анадолија (АА).

Столтенберг зборуваше на заедничката прес-конференција со претседателот на Европскиот совет Шарлс Мишел пред вториот ден од виртуелниот самит на лидерите на ЕУ.

Шефот на НАТО ќе учествува на состанокот на шефови на држави и влади на ЕУ за безбедносната и одбранбената политика на блокот.

„Во текот на изминатите години, успеавме да ја подигнеме соработката меѓу ЕУ и НАТО на невидено ниво“, истакна Столтенберг.

Тој истакна дека воениот сојуз е подготвен да работи со ЕУ за зајакнување на отпорноста и капацитетите за сајбер одбрана, како и за спротивставување на ефектите од климатските промени.

„Ние, исто така, ќе продолжиме да работиме на прашањата на кои работевме многу години, како што се стабилизирање на Западен Балкан или справување со миграцијата на Егејот“, додаде тој.

Мишел, кој е претседател на конференцијата на лидерите на ЕУ, исто така, истакна дека унијата сака да работи со НАТО за воведување „поголема стабилност и предвидливост во нашето соседство“, прилагодувајќи се на новите закани за дезинформација, хибридна и кибер војна, како и зајакнување на индустриските и технички можности.

„Посилна Европска унија значи посилен НАТО“, изјави високиот официјален претставник на ЕУ.

По преговорите со Столтенберг, лидерите на ЕУ исто така ќе дискутираат за иднината на односите на унијата со земјите од своето јужно соседство, Алжир, Египет, Израел, Јордан, Либан, Либија, Мароко, Палестина, Сирија и Тунис.