„Политико“ ја објави листата: Ердоган меѓу најмоќните луѓе во Европа

АНКАРА (АА) - Американската политичко-новинска организација „Политико“ го стави турскиот претседател Реџеп Таип Ердоган на листата „најмоќни луѓе во Европа за 2024 година“, јавува Анадолу.

„Политико“ вклучи 28 имиња од Европа на листата на „Најмоќни луѓе во Европа за 2024 година“ во три посебни категории.

Во категоријата „Спроведувачи“, турскиот претседател Ердоган, кој е опишан како „посредник“, е рангиран на петто место.

Во профилот на страницата на „Политико“ се истакнува дека Ердоган, кој „веќе подолго време се обидува да се позиционира како силен геополитички лидер“, го преживува неуспешниот обид за пуч во 2016 година. Наведено е дека Ердоган „во последно време најмногу профитираше од двете најголеми геополитички кризи, руско-украинската војна и судирот Израел-Хамас“.

- Свртено вниманието на улогата на Ердоган во Украина и Газа -

Нагласено е дека Ердоган е еден од ретките луѓе што имаат врски и со Кремљ и со кабинетот на украинскиот претседател, кој има преземено посредничка улога откако рускиот претседател Владимир Путин ги прати своите трупи во Украина во 2022 година.

Освен тоа, се наведува дека претседателот Ердоган е пионер на Црноморскиот договор за жито и дека се залага за негово продолжување.

Понатаму се наведува дека Ердоган сака уште еднаш да одигра „посредничка“ улога по нападот на Хамас на 7 октомври и дека Ердоган разговарал за „намалување на тензиите со израелскиот претседател Исак Херцог, палестинскиот претседател Махмуд Абас, како и со лидерите на Египет, Либан и Катар“.

Се додава дека потоа Ердоган се позиционира на страната на Палестина, нарекувајќи го Израел „окупатор“ и велејќи дека „Западот е вистинскиот виновник за масакрот во Газа“, се додава во „Политико“.

- Соработка со Ердоган -

Во профилот е наведено и дека Ердоган се обидува да се врати во орбитата на Европската Унија (ЕУ) и дека го искористил процесот за членство на Шведска во НАТО за да „направи исчекор“ во процесот за членство на Туркије во ЕУ, кој веќе подолго време е во стагнација.

Се истакнува дека во моментов во Туркије не се дебатира за членство во ЕУ и се додава: „Меѓутоа, претставниците на ЕУ бараат начини за зголемување на соработката со Ердоган. Сметајте го ова за уште една геополитичка победа за турскиот челник.“

Во истата категорија првопласирана е италијанската премиерка Џорџа Мелони, втора е претседателката на Европската комисија, Урсула фон дер Лајен, трет е францускиот претседател Емануел Макрон, а четврти е шефот на Кабинетот на украинскиот претседател, Андриј Јермак.

По Ердоган се потпретседателот на Европската комисија, Марош Шефчович, Марин Ле Пен од крајната десница која се натпреваруваше на минатогодишните претседателски избори во Франција, претседателката на Европската централна банка (ЕЦБ), Кристин Лагард, и Кир Стармер, лидерот на главната опозициска Лабуристичка партија во Велика Британија.