ИСТАНБУЛ (АА) - Иранскиот министер за надворешни работи Абас Арагчи денес изјави дека не биле остварени никакви контакти со американскиот претставник Стив Виткоф во последно време, при што расте стравот од можен американски напад врз Техеран, јавува Анадолу.

„Последниве денови јас и Виткоф не остваривме никакви контакти и не сме побарале разговори“, изјави Арагчи за државните медиуми, пренесе агенцијата „Фарс“.

Американскиот претседател Доналд Трамп вчера изјави дека уште една „армада“ плови кон Иран, тврдејќи дека Техеран бара дипломатско решение со Вашингтон.

„Тие сакаат договор. Го знам тоа. Се јавија во повеќе наврати. Сакаат да разговараат“, изјави Трамп за Аксиос.

Арагчи рече дека неколку земји дејствуваат како посредници и остануваат во контакт со Иран, додавајќи дека државите од регионот се загрижени за ескалацијата на тензиите.

„Земјите во регионот разбираат дека секоја воена закана би го дестабилизирала целиот регион“, предупреди тој.

Тој ги повика САД да се откажат од, како што рече, заканите, прекумерните барања и поставувањето „неразумни прашања“, истакнувајќи дека преговорите имаат свои принципи и мора да се водат на рамноправна основа.

„Преговори под закана не може да успеат“, рече Арагчи, додавајќи дека и покрај интересот за посредување од различни земји и поединци, ставот на Иран „останува непроменет“.

Тензиите меѓу Техеран и Вашингтон се зголемија по антивладините протести во Иран, при што американската администрација соопшти дека сите опции, вклучително и воена, остануваат на маса.

Иранските власти предупредија дека секој напад од САД ќе предизвика „брз и сеопфатен“ одговор.