ЖЕНЕВА (АА) – Шефот на Женевската академија за меѓународно хуманитарно право и човекови права, Стјуарт Кејси Маслен, предупреди дека бројот на убиени во Појасот Газа би можел да надмине 200.000, врз основа на податоците за значително намалување на населението од октомври 2023 година, јавува Анадолу.

Маслен во изјавата за Анадолу посочи дека населението во Газа е намалено за повеќе од 10 отсто, што, според него, укажува на можни околу 200.000 жртви.

Говорејќи за извештајот на Академијата со наслов „War Watch“, кој ја опфаќа состојбата во Газа и во уште 23 вооружени конфликти во последните 18 месеци, Маслен ја оцени ситуацијата како „драматична“.

„Иако сме задоволни што немаме интензивни судири како минатата година пред прекинот на огнот, тоа не значи дека завршиле страдањата на жителите на Газа. Остануваме длабоко загрижени за тешката состојба на целото население“, изјави тој.

Тој изрази особена загриженост за повредените лица на кои им е потребна евакуација и соодветен медицински третман, додавајќи дека „луѓето и понатаму умираат во Газа“.

Маслен нагласи дека е неопходно значително зголемување на хуманитарната помош, вклучително храна и вода и да им се обезбеди засолниште и заштита од зимските услови и медицинска нега.

„Постојат многу работи што мора итно да се сменат бидејќи состојбата останува неподнослива“, рече тој.

- Потребна е потврда на бројките -

Маслен истакна дека постои согласност оти најмалку 70.000 цивили се убиени во Газа од октомври 2023 година, меѓу Палестинците и Израелците, но дека тоа не е конечна бројка.

„Не веруваме дека тоа е конечна бројка. Тоа е бројот на пронајдени тела. Има уште многу под урнатините. Ќе биде потребно време за да се утврди точниот број“, изјави тој, повикувајќи се и на извештајот на Централното палестинско биро за статистика.

Додаде дека тие податоци сè уште треба да се потврдат.

„Ако се точни, зборуваме за над 200.000 жртви. Јасно е дека станува збор за драматична загуба на човечки животи“, рече Маслен.

Тој посочи дека веќе започнале првични чекори за обновување на Газа, но нагласи дека размерите на уништувањето се огромни.

„Ќе бидат потребни години за луѓето во Газа да се вратат на нешто слично на нормален живот“, истакна тој, додавајќи дека ќе бидат неопходни милијарди долари.

- „Геноцидот во Газа не започна на 7 октомври“ -

„Не мислам дека геноцидот во Газа започна на 7 октомври 2023 година, а ако зборуваме за правна дефиниција, не“, рече Маслен, додавајќи дека Независната меѓународна истражна комисија на ОН, без да наведува датуми, јасно навела дека во Газа се случил геноцид.

„Според меѓународното право, мора да се докаже намера за уништување, целосно или делумно, на заштитена група“, рече тој, додавајќи дека се утврдени основни кривични дела како убиства, повреди и лишување од храна.

Маслен изрази жалење што сè уште нема напредок околу налогот за апсење издаден од Меѓународниот кривичен суд (МКС), наведувајќи дека наместо тоа биле воведени санкции за судиите.

Тој нагласи дека Академијата бара правда за сите незаконски убиени лица и дека жителите на Газа го посакуваат тоа.