ЕУ одобри милијарда евра воена помош за Украина

ЛОНДОН (АА) - Советот на Европа вчера договори поддршка од милијарда евра за муниција и проектили за Украина во рамките на Европскиот мировен фонд (ЕМФ), известува Анадолу.

„Помошта во рамките на Европскиот мировен фонд (ЕМФ) дополнително ќе придонесе за јакнење и отпорност на Украина“, се вели во соопштението на Советот на Европа.

„Со мерката помош ќе се финансира снабдувањето на Украинските вооружени сили со артилериски гранати со калибар од 155 милиметри и доколку биде побарано, проектили што заедно ќе ги набават земјите членки на ЕУ од европската одбранбена индустрија“, се вели во соопштението.

Во соопштението се додава дека овие напори уште еднаш докажуваат дека Европската Унија „останува непоколеблива“ во својата поддршка на украинската војска во нејзината одбрана од Русија.

„Денешната одлука е уште еден голем чекор за испорака на поголемо количество муниција на Украина. На Вооружените сили на Украина потребни им се значителни количества муниција за одбрана на украинскиот народ и територии“, рече високиот претставник на ЕУ за надворешна политика, Жосеп Борел.

Тој додаде дека во согласност со претходната одлука за брзо обезбедување муниција од постоечките залихи, се издвојуваат две милијарди евра, со што вкупната воена помош на ЕУ за Украина изнесува 5,6 милијарди евра.

Европскиот мировен фонд е формиран 2021 година, со цел да ги поддржи своите партнери низ светот во областа на војската и одбраната „со крајна цел за спречување судири, зачувување на мирот и јакнење на меѓународната безбедност и стабилност“.