ИСТАНБУЛ (АА) - Врховниот суд на Јапонија пресуди дека само луѓето може да бидат признаени како пронаоѓачи, според државниот Закон за патентирање, отфрлајќи ја жалбата со која се бара систем на вештачка интелигенција да биде создавач на пронајдок, објавија локалните медиуми, пренесува Анадолу.

Во одлуката донесена во средата, Вториот мал совет на Врховниот суд ја отфрли тужбата поднесена од американски инженер што го оспори одбивањето на неговото барање за патент од страна на јапонскиот Завод за патенти.

Судот ги потврди пресудите на Окружниот суд во Токио и на Високиот суд за интелектуална сопственост, кои претходно го одбија барањето на тужителот, нагласувајќи дека според Законот за патенти, пронаоѓачите се ограничени исклучиво на „физички лица“.

Инженерот тврди дека одбивањето на барањето е незаконско бидејќи пронајдокот бил автономно генериран од систем на вештачка интелигенција.

Случајот се однесуваше на пријава за патент од 2020 година за садови за храна и други производи. Во поднесеното барање инженерот го наведе како пронаоѓач „ДАБУС“, систем на вештачка интелигенција што сам го развил, опишувајќи го како субјект што самостојно го создал пронајдокот.

Јапонските органи за патенти ја одбија пријавата и му наложија на барателот да наведе име на човек како пронаоѓач. Откако тој одби да го стори тоа, барањето беше и формално одбиено.