„Вистината и правдата се на наша страна“, рече Путин на парадата по повод Денот на победата

ИСТАНБУЛ (АА) - Рускиот претседател Владимир Путин денес во своето обраќање по повод 80-годишнината од Денот на победата изјави дека вистината и правдата се на страната на неговата земја и дека цела Русија ја поддржува нејзината „специјална воена операција“ во Украина, известува Анадолу.

„Вистината и правдата се на наша страна. Целата земја, целото општество и народот ги поддржуваат учесниците во специјалната воена операција. Горди сме на нивната храброст и решителност. Таа сила на духот што отсекогаш ни носела само победа“, рече Путин во своето обраќање на годишната парада по повод Денот на победата што се одржа на Црвениот плоштад во Москва.

Посочувајќи дека Русија се сеќава на лекциите од Втората светска војна, Путин рече дека никогаш нема да се согласат со искривувањето на нејзината историја во услови на „обиди за оправдување на џелатите и клеветење на вистинските победници“.

Путин понатаму рече дека претставниците на различни националности што го уништиле нацизмот за време на Втората светска војна засекогаш ќе останат во историјата како руски војници, особено истакнувајќи го придонесот на жителите на Централна Азија и Кавказот за победата на Советскиот Сојуз во војната.

„Целосниот пораз на нацистичка Германија, милитаристичка Јапонија и нивните сателити во различни региони на светот беше постигнат преку заедничките напори на Обединетите нации“, истакна Путин.

Претседателот на Русија во продолжение рече дека Советскиот Сојуз врз себе ги презел „најсуровите, најнемилосрдните удари“ од непријателот во конфликтот, додавајќи дека тие го одредиле целиот нејзин исход преку победите во големите битки.