ВАШИНГТОН (АА) – Американскиот потпретседател Џ.Д. Венс денес ја бранеше потребата од одржување и тестирање на арсеналот на нуклеарно оружје на Соединетите Американски Држави (САД), опишувајќи го како витална компонента на националната безбедност, јавува Анадолу.

„Имаме голем арсенал. Очигледно, Русите имаат голем нуклеарен арсенал. Кинезите имаат голем нуклеарен арсенал. Понекогаш мора да го тестирате за да бидете сигурни дека функционира и работи правилно“, изјави Венс за новинарите пред Белата куќа.

Неговите коментари дојдоа еден ден откако претседателот Доналд Трамп објави дека му наложил на Пентагон „веднаш“ да започне со тестирање на нуклеарното оружје „поради програмите за тестирање на други земји“.

Венс нагласи дека тестирањето не индицира на никаква непосредна загриженост, туку е дел од поширок режим на одржување и верификација што ја поддржува стратегиската стабилност.

„Важен дел од американската национална безбедност е да се осигуриме дека овој нуклеарен арсенал што го имаме всушност функционира правилно, а тоа е дел од режимот на тестирање.“

„Да бидеме јасни, знаеме дека работи правилно, но мора да го следите со текот на времето, а претседателот само сака да се осигури дека го правиме тоа“, додаде тој.