„Ако Бајден продолжи со Договорот за нуклеарната програма, ќе дојде до голем судир меѓу Израел и Иран"

Министерот за населби во Израел, Цачи Ханегби, рече дека доколку кандидатот на демократите за претседател на Соединетите Американски Држави (САД) Џо Бајден, победи на претседателските избори во САД и се врати на Договорот за нуклеарната програма, постигнат во времето на поранешниот претседател Барак Обама, на крајот ќе дојде до голем судир меѓу Израел и Иран, пренесува Агенција Анадолија (АА).

Министерот Ханегби во интервјуто за израелската телевизија „Канал 13“ даде проценка за можните последици врз Израел, доколку Бајден победи во трката за претседател на САД.

Министерот Ханегби изјави дека ако Бајден победи на изборите, може да дојде до голем број проблеми во врска со многу прашања, вклучувајќи ги тука и нелегалните еврејски населби на окупираниот Западен Брег, додавајќи дека Иран е исклучок.

Потсетувајќи на изјавата на Бајден дека ќе се врати на Договорот за нуклеарната програма со Техеран, Ханегби изјави: „Сметам дека ова е нешто што ќе доведе до конфликт меѓу Израел и Иран.“

Забележувајќи дека лично тој, премиерот Бенјамин Нетанјаху и огромното мнозинство Израелци на Договорот за нуклеарната програма со Иран постигнат во 2015 година гледаат како на „грешка“, Ханегби ја даде следната проценка: „Ако Бајден ја продолжи оваа политика, на крајот ќе има голем конфликт меѓу Израел и Иран.“

Договорот за нуклеарната програма меѓу земјите П5 + 1 и Иран е потпишан во 2015 година за време на мандатот на поранешниот американски претседател Барак Обама.

Американскиот претседател Доналд Трамп се повлече од овој договор во мај 2018 година.