Министрите на Германија и Франција остварија средба со новиот лидер на Сирија, Ахмед ал-Шара

ИСТАНБУЛ (АА) - Министрите за надворешни работи на Франција и Германија денес остварија средба со лидерот на новата сириска администрација, Ахмед ал-Шара, и повикаа на инклузивна транзиција на власта во нивната прва официјална посета на земјата разурната од војна по падот на Асадовиот режим во декември, јавува Анадолу.

Жан Ноел Баро и Аналена Баербок беа примени од Ал Шара во Дамаск.

За време на разговорите, Баро и Баербок „ја потврдија желбата за мирна и потребна транзиција која ќе го претставува сириското општество со сета негова различност“, се вели во соопштението на француското Министерство за надворешни работи.

Тие ја изразија својата посветеност за поддршка на широкиот процес на транзиција, при што двајцата министри го истакнаа вклучувањето на жените во претстојниот национален дијалог.

„Де факто властите се обврзаа на широко учество во транзицијата“, се вели во соопштението, и се додава дека Париз и Берлин ветиле дека ќе ја дадат својата експертиза за поддршка на конституционалната работа.

Тие ја повториле „важноста на колективната безбедност во регионот“, која вклучува продолжување на борбата против ДЕАШ, но и спречување на ширењето на хемиското оружје на режимот.

Министрите за надворешни работи повикаа на прекин на борбите во северна Сирија и на решение што ќе ги зачува безбедносните интереси на сите групи.

Франција и Германија, исто така, ветија дека ќе ја дадат својата техничка експертиза во криминологијата за борба против неказнивоста за злосторствата на режимот на Асад.

Каја Калас, шефицата за надворешна политика на Европската Унија, истакна дека двајцата претставници ја претставувале неа и 27-члениот блок. „Нашата порака до новото раководство на Сирија е дека почитувањето на принципите договорени со регионалните актери и обезбедувањето заштита на сите цивили и малцинства е од најголема важност“, истакна таа на X.

Пред средбата со Ал Шара, министерот Баро ја посети француската амбасада во Дамаск, како и затворот „Седнаја“, познат по тортурата на режимот на Асад во главниот град. Тој имаше средби и со претставници на граѓанското општество.

Башар ал-Асад, лидер на Сирија речиси 25 години, побегна во Русија откако антирежимските групи ја презедоа контролата врз Дамаск на 8 декември, ставајќи крај на режимот на партијата Баас, кој беше на власт од 1963 година.

Баербок на платформата Х истакна дека „новиот почеток е возможен само ако на сите Сиријци, мажи и жени, без разлика на нивната етничка или верска припадност, им се даде место во политичкиот процес.“