ВАШИНГТОН (АА) - Американскиот претседател Доналд Трамп вчера се сретна со израелскиот премиер Бенјамин Нетанјаху по втор пат оваа недела, во рамките на напорите за постигнување договор за прекин на огнот во Газа, јавува Анадолу.

Разговорите во Овалната соба траеја повеќе од еден час, без присуство на медиуми, по подолгата вечера во Белата куќа во понеделникот за време на третата посета на Нетанјаху на САД откако Трамп го започна својот втор мандат во јануари.

На официјалниот профил на Нетанјаху на X беше објавена кратка изјава по состанокот, во која се вели дека премиерот „ја завршил својата втора средба“ со претседателот Трамп.

Катарска делегација пристигна во Белата куќа пред состанокот на Трамп и Нетанјаху и разговараше неколку часа со високи официјални претставници, објави „Аксиос“, повикувајќи се на извор запознаен со дискусиите.

Не беше издадено соопштение од Белата куќа.

Претходно вчера, Нетанјаху се сретна со потпретседателот ЏД Венс и го посети Капитол Хил, изјавувајќи за новинарите по состанокот со претседателот на Претставничкиот дом, Мајк Џонсон, дека Израел сè уште треба да „ја заврши работата“ во Газа, вклучително и ослободување на заложниците и уништување на воените и управувачките капацитети на Хамас.

Тој рече дека можеби ќе разговара за дополнителни прашања со Трамп подоцна за време на посетата.

Специјалниот американски пратеник за Блискиот Исток, Стив Виткоф, вчера изјави дека се надева оти до крајот на неделата ќе биде постигнат договор за 60-дневен прекин на огнот во Појасот Газа, по напредокот во разговорите.

„Имавме четири проблеми, а сега ни остана само еден по два дена разговори“, рече Виткоф на состанокот заедно со Трамп.