„Израел не сака мир во регионот, ги крши сите принципи на меѓународното право“, истакна шефот на турската дипломатија

ВАШИНГТОН (АА) – Турскиот министер за надворешни работи Хакан Фидан во средата остро го критикуваше Израел за спроведување агресивна регионална стратегија која ја загрозува стабилноста на Блискиот Исток, известува Анадолу.

„Израел се обидува да ја спроведе својата стратегија на агресија не само во Палестина, туку и во Либан, Сирија и Иран“, истакна министерот Фидан на состанокот на Советот за безбедност на ОН за Блискиот Исток.

„Постои јасен модел на дејствување. Доколку ова не се реши, постои закана од уште поширока дестабилизација. Токму тоа се случува во Сирија во моментов. Израелската агресија го загрозува кревкиот мир за кој сирискиот народ плати висока цена. Овие напади ги продлабочуваат етничките поделби низ целиот регион“, рече Фидан.

Нагласувајќи дека Израел не сака мир и стабилност во регионот, Фидан го повика Советот да дејствува колективно за да спречи Сирија повторно да падне во спиралата на насилство.

„Нема принцип на меѓународното хуманитарно право што не е прекршен од страна на Израел“, рече шефот на турската дипломатија.

Фидан ја критикуваше неактивноста на Советот за безбедност на ОН во врска со Газа, велејќи дека тоа не само што ги разочарува луѓето од Газа, туку и човечкото достоинство.

Израел во среда започна воздушни напади врз Дамаск, насочени кон Министерството за одбрана и областите во близина на претседателската палата.

Претходно сириската армија распореди војници во подрачјето на Сувајда за да воспостави ред по судирите што настанаа меѓу вооружените групи Друзи и Бедуини, во кои животот го загубија најмалку 30 лица.

Израел ги продолжи нападите во јужната покраина Сувајда, предупредувајќи дека тие ќе продолжат доколку сириските сили не се повлечат. Израелската војска како причина за своите операции во Сирија наведе дека има за цел да го заштити малцинството Друзи.