Турција: Беспилотното летало „федаи“ ќе ги неутрализира заканите од дронови
Системот за откривање и уништување дронови, развиен од ХЕВЕЛСАН и „Трансваро“, беше претставен на 3. Самит за воена радарска и гранична безбедност, организиран од МУСИАД во Анкара
АНКАРА (АА) - ЃОКСЕЛ ЈИЛДИРИМ -
Турските одбранбени компании развиваат беспилотни летала камикази кои ќе имаат задача да ги неутрализираат заканите од дронови, јавува Агенција Анадолија (АА).
Системот за откривање и уништување дронови, развиен од ХЕВЕЛСАН и „Трансваро“, беше претставен на 3. Самит за воена радарска и гранична безбедност, организиран од МУСИАД во Анкара.
Директорот за развој на одбранбената технологија на ХЕВЕЛСАН, Незих Шишман, за АА изјави дека дроновите и беспилотните летала од евтино производство претставуваат сѐ поголема безбедносна закана.
Тој изјави дека веќе постојат и се користат решенијата кои компаниите претходно ги развиле наспроти заканите на дронови, а дека турските компании работат на воспоставување систем ефикасен за одбрана на големите комплекси, вклучувајќи и голем број институции во Анкара и големи воени конвои.
За прототипот на комплексот за интеграција на новите одбранбени системи од тој вид е избрана рафинеријата „Алиага“.
ХЕВЕЛСАН веќе разви повеќе видови беспилотни летала и сега интегрира нови алгоритми, радари, електро-оптика, детектори и други сегменти за да креира комплетен систем на одбрана.
„Работиме на користење на различни сензори и јакнење на оклопот. На крајот ќе постигнеме резултати кои досега ги немавме во Турција. Се залагаме за развој на систем кој ќе користи софистицирана опрема, алгоритми и вештачка интелигенција за навремено откривање, анализирање и со адекватен проектил уништување на заканата, односно на непријателското беспилотно летало“, изјави Шишман.
На развојот на камиказа-дроновите „федаи“ работи и партнерската компанија „Трансваро“. Се работи за летало чиј проектил експлодира кога се приближува на непријателската цел, моментално има дејство во радиус од 40 метри и како таков може да ги уништува поединечните беспилотни летала или јатата дронови.
„Во наредните месец или два или најдоцна до средината на декември ќе ги развиеме сите капацитети на системот и ќе демонстрираме како камиказа „федаи“ уништува беспилотно летало во воздухот. По успешните тестови и одобренија ќе примаме порачки по желба на купувачите“, изјави Шишман, и додаде дека тој систем ќе дава можност од еден центар да се контролира поширокото подрачје.
На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.