ИСТАНБУЛ (АА) – Турската вселенска компанија „Фергани спејс“ соопшти дека нејзиниот петти тест-сателит, „ФГН-100-Д3“, е успешно поставен во орбитата по лансирањето од Соединетите Американски Држави (САД), во рамки на мисија на „СпејсИкс“, јавува Анадолу.

Според соопштението на „Бајкар“, сателитот со тежина од 113 килограми е лансиран во 14:02 часот по Гринич од вселенската база Ванденберг во Калифорнија, во рамки на мисијата „Транспортер-16“ на „СпејсИкс“.

Сателитот се одвои од ракетата носач 66 минути по лансирањето, односно во 15:08 часот по Гринич, и беше поставен во планираната орбита на височина од 500 до 520 километри.

Лансирањето беше следено од тимот на „Фергани спејс“ од Центарот за набљудување и контрола на вселената при Националниот технолошки центар „Оздемир Бајрактар“ во Истанбул.

Опремен со комуникациски и навигациски системи, „ФГН-100-Д3“ веќе започна со операции во орбитата.

Претседателот на Управниот одбор и главен технички директор на „Бајкар“, Селчук Бајрактар, на турската социјална мрежа „НСоцијал“ изјави дека работата на компанијата „зад хоризонтот“ продолжува.

„ФГН-100-Д3 – петтиот тест-сателит на ‘Фергани’, кој се издвојува со своите комуникациски и навигациски способности – успешно го зазеде своето место во вселената“, рече тој.

Од „Фергани“ истакнаа дека сателитот претставува значаен технолошки напредок во однос на претходните летала, со клучни системи целосно развиени во рамките на компанијата, вклучително реакционо тркало, магнетна торзиона шипка, магнетометар, инерцијална мерна единица и глобален навигациски сателитски приемник.

Сателитот е опремен и со компјутер со вештачка интелигенција за напредни мисии, додека верификацијата на домашно развиени системи и авионика во орбитата се смета за важен чекор кон целосна независност на Турција во вселенските технологии.

„Фергани“ го проширува своето присуство во орбитата од почетокот на 2025 година.

Компанијата го лансираше својот прв сателит „ФГН-100-Д1“ во јануари 2025 година, а потоа и „ФГН-100-Д2“ на 2 ноември 2025 година, кој беше опишан како најголем приватен сателит на Турција со тежина од 104 килограми.

На 28 ноември 2025 година беше лансиран и „ФГН-ТУГ-С01“, опишан како прв сателит во светот за орбитален трансфер со хибриден погон - кој го носеше 10-килограмскиот „ФРГ-10Д1 КјубСат“.

Компанијата има за цел во наредните пет години да изгради глобален систем за позиционирање „Улуг бег“, констелација од повеќе од 100 сателити, користејќи сопствени ресурси.

Паралелно, продолжува и развојот на национална ракета носач.