ЛОНДОН (АА) - Меѓународен тим на астрономи откри нова планета, наречена „WISPIT 2b“, која орбитира околу млада ѕвезда на околу 430 светлосни години оддалеченост од Земјата, јавува Анадолу.

Планетата, за која се верува дека гасовит џин сличен по големина на Јупитер, се проценува дека е стара само околу пет милиони години - многу рана фаза во планетарни рамки.

Истражувачите истакнуваат дека откритието нуди редок увид во процесот на формирање планети.

Откритието е направено со помош на Многу големиот телескоп (VLT) на Европската јужна опсерваторија, кој се наоѓа во пустината Атакама во Чиле.

Студијата е предводена од научници од Универзитетот во Лајден, Холандија, Универзитетот во Голвеј, Ирска, и Универзитетот на Аризона, САД, а е објавена во списанието „Астрофизикал џурнал летер“, пренесе ирскиот радиодифузер РТЕ.

Кристијан Гински, предавач на Факултетот за природни науки на Универзитетот во Голвеј и втор автор на студијата, рече: „Ги користевме овие навистина кратки набљудувања на многу млади ѕвезди - само неколку минути по објект - за да утврдиме дали можеме да видиме мала точка светлина до нив што е предизвикана од планета“.

„Сепак, во случајот со оваа ѕвезда, наместо тоа откривме сосема неочекуван и исклучително убав диск од прав со повеќе прстени.“

„Кога го видовме овој диск со повеќе прстени за прв пат, знаевме дека мора да се обидеме да видиме дали можеме да откриеме планета во него, па затоа брзо побаравме дополнителни набљудувања.“

Научниците веруваат дека планетата е откриена во рамките на дискот од прав што опкружува млада ѕвезда што личи на рана верзија на нашето Сонце.