Американската Агенција за храна и лекови одобри тест за Ковид-19 преку здив

ВАШИНГТОН (АА) - Американската Агенција за храна и лекови (FDA) даде овластување за итна употреба на досега првиот дијагностички тест за Ковид-19 кој користи примероци од здив, јавува Агенција Анадолија (АА).

„Тестот „InspectIR COVID-19 Breathalyzer“ може да се спроведува во средини каде што се собираат и анализираат примероци на пациентите, како што се лекарските ординации, болниците, мобилните места за тестирање, со помош на инструмент со големина на куфер“, соопшти Агенцијата.

Оттаму се додава дека тестот го врши квалификувано, обучено лице под надзор на здравствен работник лиценциран или овластен со државниот закон за издавање тестови и може да даде резултати за помалку од три минути.

Џеф Шурен, директорот на Центарот за уреди и радиолошко здравје на ФДА, рече дека овластувањето е уште еден пример за брзата иновација што се случува со дијагностичките тестови за Ковид-19.

„Агенцијата продолжува да го поддржува развојот на нови тестови за Ковид-19 со цел да се унапредат технологиите кои можат да помогнат во справувањето со тековната пандемија и подобрата позиција на САД за следната вонредна состојба во јавното здравје“, се нагласува во соопштението.