АНКАРА (АА) ‒ „Istanbul Photo Awards“ е важен натпревар за фоторепортерите и нешто што заедницата со нетрпение го чека, изјави фоторепортерот Ален Шредер, првонаграден во категоријата „Серија фотографии од спортот“ за 2021 година, јавува Агенција Анадолија (АА).
Среде притисокот на пандемијата на Ковид-19, кога целиот свет беше исполнет со грижи и се обидуваше да го задржи секојдневниот живот, „Istanbul Photo Awards“ на Агенција Анадолија сепак успеа да отслика незаборавни настани со непобитната моќ на фотографиите.
Шредер е меѓу групата фоторепортери кои поминаа речиси три месеци затворени во стан во главниот град на Казахстан, Нур Султан, откако пристигна да ги фотографира традиционалните игри со коњи „Кок Бору“ во март 2020 година.
Поради мерките преземени од Владата на Казахстан тој не можеше да ги снима игрите бидејќи мораше да остане во станот. Се врати во главниот град истиот ноември за уште една шанса за да го покрие натпреварот.
„Се обидував да најдам различни агли и ситуации кои покажуваат емоции, ги тестирав механизмите со камера. Патував со недели низ земјата за да најдам игралишта на одлични места, под планините или покрај вода“, изјави Шредер за АА.
Тој го освои и третото место во категоријата „Вести“ на минатогодишниот натпревар.
Спомнувајќи колку луѓе му рекле дека благодарение на неговите фотографии дознале за маките на орангутаните и уништувањето на живеалиштата поради „нелегалната сеча, рударството и експлоатацијата на палминото масло“, тој ја нагласи моќта на добрите фотографии, велејќи: „Фотографијата апсолутно може да има влијание и да направи разлика.“
„„Istanbul Photo Awards“ сега е важен натпревар за фоторепортерите и настан што со нетрпение го очекуваме“, рече тој.
- Радост за успех во престижна конкуренција -
Роман Вондроус, фоторепортер во Чешката новинска агенција, ја освои првата награда во категоријата „Единечна фотографија од спортот“ за неговата работа во главниот град Прага.
Тој ги фотографира фудбалерите на Боеми 1905 Прага како им се заблагодаруваат на своите навивачи по натпреварот против ФК Прибрам на 15 декември 2020 година на стадионот „Доличек“.
И покрај забраната за присуство на навивачите на натпреварот поради ограничувањата за Ковид-19, неколку навивачи успеаја да го проследат целиот натпревар стоејќи на скали за да можат да ѕирнат во стадионот.
„Не е лесна работа да се внимава на целиот натпревар додека се балансира на скала“, изјави Вондроус за AA.
„Интересно беше и тоа што многу од навивачите не се колебаа да патуваат со своите скали низ целиот град со јавен превоз или со автомобил“, додаде тој.
„Јас и мојот колега избравме една од зградите спроти стадионот и го прашавме сопственикот дали можеме да направиме неколку фотографии од неа“, рече тој.
„Имавме среќа што победи домашниот тим, а играчите се упатија кон навивачите за да им се заблагодарат по натпреварот. Тоа беше токму снимката што ја чекавме.“
И покрај технолошкиот напредок што им помага на фоторепортерите да направат добри фотографии во повеќето ситуации, Вондроус објасни: „За да направите исклучителна фотографија, сепак мора да бидете на вистинското место во вистинско време; тоа воопшто не се промени.“
„Дури и во ова комплицирано време што го доживуваме, убеден сум дека фотографиите сè уште имаат моќ да ја прикажат нашата ера на извонреден начин“, нагласи тој.
Споменувајќи дека по објавувањето на победниците на „Istanbul Photo Awards“, добил многу мејлови и пораки со честитки, тој рече: „Бев навистина среќен што успеав да успеам на еден ваков престижен натпревар на кој фотографиите ги оценува угледно жири.“
Тој уште еднаш поднесе некои од неговите фотографии за следниот круг на натпреварот и додаде дека би бил навистина благодарен за секое признание.
Вондроус ја освои и втората награда во категоријата „Единечна фотографија од спортот“ во 2015 година.
За повеќе информации за истакнатите фотографии наградени со „Istanbul Photo Awards“, посетете го istanbul photo awards.com.
На веб-страницата професионалните фотографи можат да поднесат и пријави за конкурсот за 2022 година до 15 февруари.
Победниците добиваат парични награди, а фотографиитевлегуваат во фотокнигата за награди и меѓународни изложби.
Натпреварот во 2022 година е поддржан од „Канон“, Турската агенција за соработка и координација (ТИКА) и „Туркиш ерлајнс“, турскиот национален авиопревозник.
