АДИЈАМАН (АА) – Археолошките ископувања во античкиот град Пере, во јужната турска објаст Адијаман, открија станбена градба стара 1.500 години, која датира од римскиот период, соопштија официјални претставници, јавува Анадолу.

Тим од четворица археолози и 20 работници открил станбен простор од 154 квадратни метри во кој се наоѓале тандур и две меѓусебно поврзани простории, укажувајќи дека станува збор за домашно живеалиште.

Античкиот град Пере, еден од петте главни центри на древната цивилизација Комагена, и годинава донесе значајни археолошки откритија.

Во разговор за Анадолу, Мехмет Јелкен, директорот за култура и туризам на Адијаман, рече дека на локалитетот се пронајдени бројни артефакти што го одразуваат секојдневниот живот, вклучувајќи монети, бронзени предмети и разни предмети од домаќинството.

Новооткриените архитектонски остатоци се откриени во близина на базиликата позната по својот „Рајски мозаик“.

Јелкен посочи дека стратешката позиција на Пере, на раскрсницата на древните трговски и воени патишта, постојано носи богати археолошки резултати. Според него, присуството на тандурот јасно укажува дека станбениот простор бил активно користен.

Археолошките активности во Пере, кој носи траги од римскиот период, се изведуваат повремено од 2001 година, а досега се откриени римски фонтани, масивни камени структури, водни канали и голем број архитектонски остатоци.