Rabia İclal Turan
30 Декември 2020•Ажурирано: 01 Јануари 2021
АНКАРА (АА) - Европската Унија соопшти дека ќе купи дополнителни 100 милиони дози од вакцината против Ковид-19, заеднички изработена од американскиот производител на лекови „Фајзер“ и германската фирма „БајоНТех“, со што вкупното количество достигна до 300 милиони дози по првата пратка минатата недела, пренесува Агенција Анадолија (АА).
„Одлучивме да набавиме дополнителни 100 милиони дози од вакцината на „Фајзер“/„БајоНТех“, што веќе се користи за вакцинирање во ЕУ“, рече шефицата на Европската комисија, Урсула фон дер Лајен на Твитер.
Таа додаде дека ЕУ според тоа ќе има 300 милиони дози од вакцината која беше одобрена од Европската агенција за медицина (ЕМА) на 22 декември.
„Ќе набавиме уште повеќе вакцини!“, рече Фон дер Лајен.
ЕУ склучи договори со шест компании кои досега спроведоа ветувачки студии за вакцини и треба да купи околу 2 милијарди дози вакцини, вклучувајќи ги и 300 милиони дози од „Фајзер“ и „БајоНТех“.
Унијата, исто така, потпиша договори со „Модерна“, „АстраЗенека“, „КјурВак“, „Џонсон и Џонсон“ и „Санофи-ГлаксоСмитКлајн“.
ЕМА - Агенција на ЕУ што ја одобрува употребата на лекови низ земјите членки - се очекува да го заврши прегледот на вакцината од „Модерна“ до 6 јануари.
