Ayhan Şimşek
18 Март 2020•Ажурирај: 19 Март 2020
БЕРЛИН (АА) - Агенцијата за контрола на болести на Германија денес предупреди дека во наредните три месеци, речиси 10 милиони лица во Германија би можеле да се заразат со Ковид-19, доколку не се преземат строги мерки за спречување на ширењето на вирусот, јавува Агенција Анадолија (АА).
Говорејќи на прес-конференцијата во Берлин, Лотар Вилер, шефот на Институтот „Роберт Кох“, изјави дека последните мерки на Владата за ограничување на социјалниот контакт на јавни места и за затворање на продавниците, баровите и спортските сали, се од особена важност за спречување на ширењето на новиот тип коронавирус, Ковид-19.
„Доколку не успееме во ефективно ограничување на социјалниот контакт во текот на претстојните недели, постои можност во текот на наредните два до три месеци во земјата да имаме до 10 милиони случаи на коронавирус“, изјави тој, додавајќи дека таквото сценарио може да доведе до колапс на здравствениот систем на земјата.
Тој ги повика граѓаните да ги следат основните мерки за хигиена, да се воздржат од собири, да се држат на растојание од најмалку 1,5 метри од другите и да останат во своите домови, освен доколку треба да излезат од најсуштински причини.
Германија е третата најпогодена земја од пандемијата на коронавирусот во Европа, по Италија и Шпанија.
Бројот на потврдени случаи на зараза со овој вирус во земјата утринава се зголеми на 9.877.
Според соопштенијата од локалните здравствени власти, бројот на починати лица достигна 26.
