Övünç Kutlu
17 Ноември 2021•Ажурирај: 17 Ноември 2021
АНКАРА (АА) - Компанијата „Фајзер“ соопшти дека поднела барање до американската Управа за храна и лекови (FDA) за одобрување за итна употреба на лекот против коронавирусот во форма на таблета, јавува Агенција Анадолија (АА).
Барањето ги опфаќа податоците од најновите испитувања на американската фармацевтска компанија. „Фајзер“ на 5 ноември соопшти дека таблетата „паксловид“ го намалува ризикот од хоспитализации или од смрт од последиците на коронавирусот за 89 отсто.
„Доколку одобрениот „паксловид“ биде прв орален антивирусен лек од тој вид, посебно дизајниран за борба против САРС-КоВ-2, би можел да се препишува за клучно лекување на високоризичните пациенти на првиот знак на вирусот“, се наведува во соопштението на компанијата.
Досега, за сите третмани за коронавирусот кои ги одобри ФДА е потребна интравенска инјекција под надзор на здравствените работници во болниците и клиниките.
„Со повеќе од 5 милиони смртни случаи и безброј животи погодени со оваа разорна болест на глобално ниво, постои итна потреба за опциите за лекување кои спасуваат животи“, изјави претседателот и извршен директор Алберт Бурла.
Тој додаде дека цел им е пациентите што побрзо да го добијат овој лек, и дека се радуваат за соработката со американската ФДА и другите регулаторни агенции низ светот.
Од „Фајзер“ претходно е соопштено дека потпишале договор за лиценцирање со меѓународната организација „Медисинс патент пул“ (Medicines Patent Pool), поддржана од „Јунитеид“, кој им овозможува на другите произведувачи на лекови да произведуваат свои антивирусни лекови за Ковид-19 во 95 земји со низок и среден приход, кои сочинуваат приближно 53 отсто од светската популација.
Компанијата напомена дека ќе започне да вложува до милијарда долари за поддршка на производството и дистрибуција на таблетите.
„Фајзер“ стана втора компанија во светот која разви лек против коронавирусот по антивирусниот лек „молнупиравир“ за орален третман на компанија „Мерк“ претставен на 1 октомври.
