Поранешниот астронаут на Аполо 8, Вилијам Андерс, загина во авионска несреќа кај Сиетл

ИСТАНБУЛ (АА) - Поранешниот астронаут на Аполо 8, Вилијам Андерс, загина во авионска несреќа во близина на Сиетл доцна синоќа на 90-годишна возраст, пренесува Анадолу.

Смртта на Андерс ја потврди неговиот син, Грегори Андерс, кој за Си-ен-ен изјави дека неговиот „тато загинал во авионска несреќа на островите Сан Хуан“, во сојузната држава Вашингтон, објави Си-ен-ен.

„Семејството е во тага поради загубата на големиот пилот“, истакна Грегори Андерс.

Инцидентот се случил во близина на брегот на островот Џонс, според канцеларијата на шерифот на округот Сан Хуан, соопшти Си-ен-ен.

Диспечерскиот центар добил дојава околу 11:40 часот по локално време за постар модел на авион кој летал на југ пред да падне во водите во близина на северниот крај на островот Џонс и да потоне, додаде канцеларијата.

Американската крајбрежна стража, исто така, објави дека извршила пребарување во должина од 215 наутички милји (398 километри), при кое го нашле и извлекле телото на пилотот со помош на нуркачки тим.

- Кој е Вилијам Андерс?

Вилијам Андерс е роден на 17 октомври 1933 година во Хонг Конг, а дипломирал на Американската поморска академија во 1955 година, каде што се стекнал со „пилотските крилја“ следната година откако е примен во воздухопловните сили на САД.

Како пилот на борбен авион служел во Калифорнија и Исланд и раководел со програмите за заштита на реактор на нуклеарна енергија и радијационите ефекти во Лабораторијата за оружје на воздухопловните сили во Ново Мексико, според НАСА.

Избран од НАСА за астронаут во 1964 година, Андерс беше резервен пилот за мисијата Џемини 11 и Аполо 11, со повеќе од 6.000 часа летање.

Во декември 1968 година, тој орбитираше околу Месечината во мисијата Аполо 8 со Џим Ловел и Френк Борман, фотографирајќи ја познатата фотографија „Изгрев на Земјата“, која ја опиша како клучен момент во човечката историја. „Го поминавме цел овој пат за да ја истражиме Месечината, а најважно е што ја откривме Земјата“, рече тој.

Покрај неговите вселенски мисии, Андерс беше и извршен секретар на Националниот совет за аеронаутика и вселена од 1969 до 1973 година и беше назначен за прв претседател на Нуклеарната регулаторна комисија од претседателот Џералд Форд.

Зад Андерс останаа сопругата, две ќерки и четири сина.