Hümeyra Ayaz
15 Октомври 2025•Ажурирај: 16 Октомври 2025
АНКАРА (АА) - Турскиот министер за енергетика и природни ресурси Алпарслан Бајрактар изјави дека дошле до последната фаза од инвестицискиот проект вреден една милијарда долари со Обединетите Арапски Емирати (ОАЕ) за изградба на соларна електрана од 1.100 мегавати за складирање енергија во округот Бор, во турската област Ниде, јавува Анадолу.
Во објавата на турската платформа за социјални медиуми NSosyal, Бајрактар рече дека Министерството им било домаќин на Мохамед Џамил ал-Рамахи, извршен директор на енергетската компанија „Масдар“, со седиште во ОАЕ, и неговата делегација.
Бајрактар рече дека разговарале за сеопфатни можности за соработка со ОАЕ, вклучително и за сончевата енергија, енергијата од ветер на копно и море, пумпно- акумулациони хидроцентрали и за трансферот на технологија.
„Стигнавме до последната фаза на соларната електрана со капацитет од 1.100 мегавати, вредна приближно една милијарда долари, со капацитет од околу 1.100 мегавати, со складиште што ќе се гради во Ниде Бор“, рече Бајрактар.
Исто така, тие разговарале и за потенцијални инвестиции во ветерни електрани на море, систем за пренос на електрична енергија на долги растојанија и пумпно-акумулациони хидроенергетски проекти, откри Бајрактар.
„Целта ни е да ја продлабочиме нашата стратешка соработка со ОАЕ преку меѓувладин меморандум за разбирање во областа на обновливата енергија. Со овие партнерства, кои ќе ја зајакнат нашата енергетска инфраструктура и визија, целиме кон остварување на целта за јаглеродно-неутрална Турција до 2053 година и да станеме пример за енергетска трансформација во регионот,“ изјави Бајрактар.
