АНКАРА (АА) - Турските производители на авиони, Турската индустрија за воздухопловство и вселена (ТУСАШ) и Бајкар, се рангирани меѓу 50-те најголеми воздухопловни компании во светот, известува Анадолу.
„Counterpoint Market Intelligence“ состави листа на 100 најголеми авиокомпании врз основа на нивната активност во 2023 година.
Цивилното воздухопловство, еден од најпогодените сектори од пандемијата, направи значително враќање, а Боинг и Ербас, водечките компании во авиоиндустријата, се вратија на врвот на листата.
На првото место на листата е компанијата „Боинг“ со приход од 77,8 милијарди долари. На второ место е „Ербас“ со 70,8 милијарди долари.
Компанијата RTX, специјализирана за решенија поврзани со авијацијата во одбранбениот сектор, го зазеде третото место со 68,9 милијарди долари, додека Локхид Мартин е на четвртото место со приход од 67,6 милијарди долари.
На листата на 100-те најголеми авиокомпании за 2023 година се наоѓаат и две турски компании - ТУСАШ, рангирана на 38-то место, и Бајкар, на 49-то место.
ТУСАШ игра витална улога во одбранбениот и воздушниот сектор на Туркије, унапредувајќи ги националните способности и соработувајќи на клучни меѓународни проекти.
Бајкар е истакната турска компанија во одбранбениот сектор специјализирана за развој и производство на беспилотни летала и други напредни одбранбени технологии. Водечките беспилотни летала на Бајкар, меѓу кои спаѓаат леталата „Бајрактар TB2“ и „Акинџи“, се надалеку познати и признати на глобалниот одбранбен пазар поради нивните технолошки иновации и оперативната ефикасност.
