Околу 700 милиони туристи патувале низ светот од почетокот на 2023 година

ПАРИЗ (АА) - Во периодот јануари - јули меѓународниот туризам достигна 84 отсто од нивото пред пандемијата, пред сѐ поради силното закрепнување на Блискиот Исток, Европа и Африка, објави Светската туристичка организација (UNWTO), јавува Анадолу.

Околу 700 милиони туристи патувале во странство во првите седум месеци од 2023 година, што е за 43 отсто повеќе од претходната година.

Јули беше најпрометниот месец од почетокот на годината, со 145 милиони меѓународни патници.

„Екстремните временски услови на кои бевме сведоци во последните месеци, како и одредени предизвици за управување со растечките туристички текови, ја нагласуваат потребата од изградба на поинклузивен, поодржлив и поотпорен туристички сектор“, рече Зураб Пололикашвили, генерален секретар на Светската туристичка организација (UNWTO).

Благодарение на силната интрарегионална побарувачка и патувањата од Америка, Европа достигна 91 отсто од нивото пред пандемијата.