Министрите за правда на ЕУ разговараат за компензација на Украина од конфискуваните руски средства

БРИСЕЛ (АА) - Министрите за правда на ЕУ денес ќе одржат состанок на кој ќе разговараат за правните нацрти за исплата на компензација за Украина од конфискуваните руски средства, јавува Анадолу.

„Исто така, ќе бидам среќен да известам за напредокот на важната директива во врска со казните за прекршување на санкциите на ЕУ, но исто така и во врска со враќањето и конфискацијата на имотот“, изјави шведскиот министер за правда, Гунар Штромер, за новинарите на патот до состанокот.

Тој нагласи дека дискусиите ќе ги надминат „принципите“ и ќе се фокусираат на „конкретни и практични“ решенија за сложените правни проблеми за избегнување на санкциите и поддршката на Украина од конфискуваните руски средства.

Еврокомесарот за правда, Дидие Рејндерс, рече дека ЕУ има за цел „да ги изведе пред правдата сите сторители на злосторствата во Украина“.

Според најновите податоци објавени од Европската комисија во февруари, ЕУ замрзнала 21,5 милијарди евра (22,7 милијарди долари) руски средства во рамките на нејзиниот режим на санкции насочени кон луѓето одговорни за војната во Украина.

Украина побара компензација финансирана од конфискуваните средства на приватни лица кои ѝ помогнаа на Русија, да ја обнови земјата по војната што започна минатиот февруари.