ЕУ сака да го зголеми бројот на жени менаџери во компаниите

БРИСЕЛ (АА) - Институциите на Европската Унија (ЕУ) поставија цел до 2026 година да ја зголемат стапката на жени менаџери во компаниите до 40 проценти, јавува Агенција Анадолија (АА).

Европскиот парламент (ЕП) и Европскиот совет соопштија дека во преговорите е постигнат договор за директивата за зајакнување на родовата еднаквост во управувањето со компаниите кај земјите членки.

Според тоа, ќе се зголеми процентот на жени членки во одборите на директори на компаниите.

Најмалку 40 проценти од менаџерските позиции во компаниите ќе бидат заземени од жени до 2026 година.

Компаниите ќе треба да преземат чекори за да обезбедат процентот на жени на сите високи позиции, вклучувајќи го и Одборот на директори, да биде најмалку 33 проценти.

За да се постигне целта, компаниите ќе треба да им дадат приоритет на жените кандидати при изборот меѓу подеднакво квалификувани кандидати.

Компаниите кои нема да ги исполнат овие цели ќе мора да покажат дека следеле транспарентен процес при назначувањето или при изборот на менаџери.

Целта нема да ги опфати малите и средните компании со помалку од 249 вработени.

За директивата да стапи во сила, таа мора да биде официјално одобрена од ЕП и Европскиот совет и објавена во Службениот весник на ЕУ.

Во моментов, во земјите на ЕУ, 30,6 отсто од членовите на одборите и 8,5 отсто од претседателите на одборите се жени.