БРИСЕЛ (АА) – Советот на Европската Унија одлучи да ги продолжи економските санкции против Русија за уште шест месеци, како одговор на продолжувањето на војната во Украина, се наведува во соопштението на ЕУ, јавува Анадолу.

Мерките ќе останат во сила до 31 јули 2026 година, се вели во соопштението.

Санкциите првпат беа воведени во 2014 година, а значително проширени по почетокот на војната во Украина во 2022 година.

Тие се насочени кон клучни сектори на руската економија, вклучувајќи ограничувања во трговијата, финансиите, енергетиката, технологијата, стоките со двојна намена, индустријата, транспортот и луксузните производи.

Санкциите, исто така, опфаќаат забрана за увоз и трансфер на сурова нафта и одредени нафтени деривати што се транспортираат по море од Русија, исклучување на повеќе руски банки од финансискиот систем СВИФТ, како и суспензија на емитувањето и дозволите за работа на медиуми поддржани од Кремљ, кои ЕУ ги оценува како канали за дезинформации.

Дополнително, воведени се и конкретни механизми за спречување на заобиколување на санкциите.

„Сè додека незаконските дејствија на Руската Федерација продолжуваат да ги кршат основните правила на меѓународното право, вклучително и забраната за употреба на сила, соодветно е да се задржат сите мерки воведени од ЕУ и, доколку е потребно, да се преземат дополнителни“, се наведува во соопштението.

Одделно, Европската Унија воведе санкции против двајца руски судски функционери поради нивната улога во „сериозни прекршувања на човековите права и репресија врз граѓанското општество и опозициските фигури“.

Санкциите се насочени кон Дмитриј Гордеев, судија во градскиот суд во Москва, и обвинителката Људмила Баландина.

Според ЕУ, Гордеев донесувал „политички мотивирани пресуди против опозициски фигури и бранители на човековите права“, додека Баландина водела политички мотивирани судски постапки „против критичари на руската Влада и поддржувачи на Украина“.

Санкциите предвидуваат замрзнување на нивниот имот во ЕУ и забрана за патување, што значи дека им е оневозможен влез или транзит низ земјите членки. На граѓаните и компаниите од ЕУ, исто така, им е забрането да им ставаат на располагање финансиски средства.