Шефот на македонската дипломатија Муцунски се сретна со американскиот колега Рубио

СКОПЈЕ (АА) - Министерот за надворешни работи на Северна Македонија, Тимчо Муцунски, се сретна во Брисел со американскиот државен секретар Марко Рубио, јавува Анадолу.

Средбата се одржа на маргините на состанокот на министрите за надворешни работи на земјите членки на НАТО.

Како што објави Муцунски во својот профил на социјалните мрежи, двајцата шефови на дипломатија разговарале за билатералната соработка и заедничките приоритети во рамките на НАТО.

Муцунски наведе дека била потврдена заложбата за зајакнување на политичкиот дијалог и покренување нови иницијативи.

„Пред нас стојат многу заеднички иницијативи“, напиша Муцунски.

Инаку, денеска во Брисел се одржува состанок на министрите за надворешни работи на земјите-членки на НАТО, во пресрет на самитот на НАТО во јуни, на кој се очекува да се постави терен за натамошна координација на политиките меѓу членките на алијансата.

Извори велат дека средбата, која ја означува првата колективна консултација меѓу новата американска администрација и сојузниците во НАТО, ќе опфати низа безбедносни прашања, вклучително и колективната одбрана, војната во Украина и соработката на НАТО со своите партнери во Азија-Пацифик.