Шефицата на косовската дипломатија: „Того го повлече признавањето на Косово во 2019 година“

ПРИШТИНА (АА) - Министерката за надворешни работи и дијаспора на Косово, Доника Гервала, изјави дека Того го повлекол признавањето на Косово во 2019 година и дека вчерашната прес-конференција во Белград била само српска пропаганда, јавува Агенција Анадолија (АА).

Министерот за надворешни работи на Того вчера во Белград изјави дека неговата земја го повлекла признавањето на Косово, а Гервала рече дека тоа се случило во 2019 година, односно многу пред да стапи на функција оваа влада.

„Косово ќе ја добие својата битка денес, како што победи во 1999 година. Со мудрост, храброст, пожртвуваност и со многу пријатели и сојузници низ слободниот и демократски свет. И Србија повторно ќе загуби, како што загуби во 1999 година, бидејќи вистината секогаш ја победува лагата“, напиша Гервала на Фејсбук.

Таа рече дека „Ивица Дачиќ, Александар Вучиќ и сите други момчиња на балканскиот месар Слободан Милошевиќ можеби ќе победат во спринтот, но Косово и неговите граѓани на крајот ќе победат на маратонот, како што го освоија во 1990-тите“.

„Ако без друга причина, тогаш заради болната и колосална жртва на нашиот пат кон слободата“, напиша Гервала.

Белград тврди дека десетина земји го повлекле признавањето на Косово, но Министерството за надворешни работи и дијаспора на Косово го негира тоа. Амбасадорите на Косово неодамна објавија дека се сретнале со претставници на некои од земјите кои се на списокот што го претстави српскиот претседател Вучиќ, како Либија, Сомалија, Габон, Малдиви и Свазиленд.