Шекеринска: „Членството во НАТО не го сметавме како завршен чекор“

СКОПЈЕ

Во главниот град на Северна Македонија се одржа финалната конференција на групата за воена интеграција на Република Северна Македонија во НАТО, јавува Агенција Анадолија (АА).

На конференцијата учествуваше и министерката за Одбрана на Северна Македонија, Радмила Шекеринска, која имаше воведно обраќање пред претставниците на работната група за интеграција.

Во изјава за медиумите, министерката Шекеринска изјави дека со последната интегративна конференција помеѓу Северна Македонија и НАТО алијансата и со формалното потпишување на декларацијата, настан што е предвиден за утре, ќе се констатира дека земјата во целост ги исполни условите и е целосно воено интегрирана со НАТО.

„Со ова покажавме дека членството во НАТО не го сметавме како завршен чекор, туку бевме свесни дека треба да работиме за да станеме навистина еднакви со сите“, рече Шекеринска.

Таа додаде дека со ова ќе се комплетира воената интеграција на Северна Македонија во НАТО алијансата. Шекеринска истакна дека ова се должи на големата активност и труд на луѓето во армиската структура, кои со своите колеги од НАТО реализира 193 задачи од интегративниот план.