Српскиот претседател Вучиќ: „Туркије е најмоќната земја на Балканот“

БЕЛГРАД (АА) - Српскиот претседател Александар Вучиќ денес на заедничката прес-конференција со турскиот претседател Реџеп Таип Ердоган изјави дека трговската размена на двете земји е зголемена за седумпати и дека Туркије е најмоќната земја на Балканот од која очекуваат поддршка во сите процеси, јавува Анадолу.

„Туркије и Србија имаат добри економски односи, трговската размена е за седумпати поголема во споредба од пред само неколку години“, изјави Вучиќ.

Велејќи дека некои делови во Србија преживуваат благодарение на турските инвестиции, Вучиќ рече дека Србија ги цени своите пријателски односи со Туркије кои се важни за политичките и економските односи и во евроазиски и во глобални размери.

„Во сите сфери на општествениот живот нашата соработка мора да расте и благодарни сме на турските инвеститори. Реков дека во Србија има места кои буквално опстојуваат благодарение на некои од турските инвеститори“, рече Вучиќ.

„Постои огромен потенцијал за соработка на полето на одбранбената соработка“, додаде тој.

Тема на разговор меѓу двајцата лидери беше и ситуацијата на Балканот. Вучиќ рече дека Ердоган секогаш се залагал за дијалог и мир на Балканот.

„Туркије е еден од или најголем играч на Балканот и најмоќната земја и од неа очекуваме поддршка во сите овие процеси. Благодарен сум на претседателот Ердоган што секогаш го сакаше ова и секогаш го кажуваше гласно и што секогаш сакаше да разговара со сите“, рече Вучиќ и додаде:

„Ние високо ја цениме политичката позиција на претседателот Ердоган, кој води независна, суверена земја, во интерес на граѓаните и народот на Туркије, а не во интерес на некои други сили“.

Српскиот претседател нагласи дека Ердоган го променил ликот на Туркије и дека ја направил „една од најмодерните земји во светот“.

Српскиот претседател уште еднаш ја повтори поддршката на неговата земја за територијалниот интегритет на Босна и Херцеговина и интегритетот на босанскохерцеговскиот ентитет Република Српска.

Вучиќ нагласи дека Србија не е заинтересирана за војни, но дека земјата треба да има доволно сила да одврати некого.