Србија: Одреден притвор на тројцата косовски полицајци

ПРИШТИНА (АА) – На тројцата косовски полицајци им е одреден притвор во Вишото јавно обвинителство во Краљево, Србија, пренесува Анадолу.

По предлог на јавниот обвинител на Вишото јавно обвинителство во Краљево, „судијата за претходна постапка при Вишиот суд во Краљево на сите осомничени им одреди притвор“, се наведува во соопштението објавено на веб-страницата на Вишото јавно обвинителство во Краљево.

„По повод настаните од 14 јуни, во село Гњилица, општина Рашка, Вишото јавно обвинителство на Краљево донесе наредба за спроведување истрага против осомничените Б.С. (1965), Р.З. (1975) и М.Ш. (1961) поради постоење основи на сомнение дека сториле по едно кривично дело недозволено производство, држење, носење и тргување со оружје и експлозивни материи“, се вели во соопштението.

Тројцата косовски полицајци, како што тврди Владата на Косово, се киднапирани во средата додека биле во погранична контрола, длабоко на територијата на Косово, долж северната граница со Србија. Од друга страна, официјален Белград тврди дека косовските полицајци се уапсени длабоко на територијата на Србија.

Мисијата на КФОР, предводена од НАТО, синоќа соопшти дека не била во подрачјето кога српската полиција ги уапсила тројцата косовски полицајци, но дека испратила тим во тоа подрачје и воспоставила контакт со претставници на косовските институции и српските власти.

„Ги повикуваме двете страни веднаш да ги намалат тензиите и да се воздржат од еднострани дејствија кои би можеле да доведат до понатамошна ескалација“, се истакнува од КФОР.