БЕЛГРАД (АА) - Претседателот на Србија, Александар Вучиќ, во Палатата Србија по повод собирот против ископувањето на литиум рече дека тој се одвивал во демократска атмосфера, но кога собирот завршил, дошло до блокада на пругата и сопирање на сообраќајот на мостот Газела, јавува Анадолу.
„Самиот собир помина во демократска атмосфера, што е многу важно за нашата земја. Беше онака како што е потребно да функционира во демократските земји. Меѓутоа, откако заврши собирот, се случија работи кои ги очекувавме. Затоа што секој ден кога се заканувате, доаѓа до ситуација во која ќе преовлада насилството, и тоа извршување на тешки кривични дела. Заземање на Прокоп, станицата во Нови Белград, запирањето на мото-пат и работата на самиот мост Газела не беа придонес кон демократијата, туку исмејување на демократијата како политички режим и спроведување на насилство и терор на малцинството“, рече Вучиќ.
Тој истакна дека не разбира зошто луѓето што живеат во Србија сакаат да ја уништат економијата на Србија. Говореше и за пишувањето на медиумите во Србија и регионот.
„Ги разбирам овие од регионот, го разбирам нивното одушевување во Приштина за синоќешниот собир, ги разбирам директните преноси во медиумите на Курти. Ја разбирам фасцинацијата, желбите и заканите, како што велат во „Ослобоѓење“, „Борба против злосторствата на Вучиќ“, па „Слободна Босна“ ова би можело да ја одведат Србија во граѓанска војна, па „Јутарњи лист“ па „Дневно“, најавуваат граѓанска војна и му се надеваат, велат еден автократ сака да ја опустоши природата за да остане на власт. Ја разбирам нивната желба на Србија да ѝ биде полошо, немам никаков проблем со тоа, така што мислам дека секој што чита или слуша што се зборува во Приштина, Загреб и официјална Подгорица сосема му е јасно на која страна треба да биде. И дека во исто време разбира сè одлично. Само не разбирам зошто овие луѓе што живеат во оваа земја сакаа да ја уништат економијата на Србија“, рече Вучиќ.
Тој посочи дека властите упатувале повици за разговори.
„Повикавме на разговори, повикуваше претседателката на Народното собрание, не сакаа да дојдат. Повикавме претставници на разни организации и здруженија, најчесто платени од надвор, а и други, никој не сакаше да разговара. Мислеа дека разговорот е закана, уништување на српската економија, српските пруги и сѐ друго. Кога нешто не ви се допаѓа, го решавате со разговор“, рече српскиот претседател.
Тој најави посети на Лозница и Крупањ и други места и разговор со народот, нагласувајќи дека нема да одржува големи собири за да покаже колку луѓе може да собере.
„Ќе одам да разговарам со оние кои мислат поинаку, со обичните луѓе. Да зборувам за нивниот страв“, рече тој.
Додаде дека ќе ја штити природата, како и здравјето на децата и нагласи дека сѐ уште не се знае дали ќе се оди со ископ или не, како и дека уште две години сигурно нема да се ископува литиумот.
„Добивме некои студии, некои допрва ќе ги видиме. Тогаш ми завршува мојот мандатот. Дали луѓето во Србија навистина мислат дека сум блесав и луд, дека ќе направам нешто против својата земја и својот народ? Вие ја сакате земјата повеќе отколку јас? Поради што? Затоа што така смисливте или имате повеќе информации од мене? Тешко“, рече тој.
Наведе дека формирале здравствен тим, бидејќи ќе ја следат секоја евентуалност за да имаат целосна превенција.
„Имаме ли нешто непознато? Секако дека имаме. Јас ќе бидам најлошиот можен полицаец за Рио Тинто, ќе бидам полош јас отколку сите оние кои наводно се бореле против нив, а всушност сакаат да дојдат до власт“, рече Вучиќ.
Зборувајќи за отворањето на мостот на Ибар, кое се очекува за 14 и 15 август, Вучиќ го повика КФОР да реагира и да не дозволи еднострано отворање.
„На Косово и Метохија на 14 и 15 очекуваме насилно отворање на мостот, ќе се обидат да наметнат некои нови српски лидери, да ги прикажат како храбри иако не се, а кој ќе се обидат да ги одвојат од Белград, па со Курти да се договараат како да му бидат слуги, а всушност да работат за странски интереси. Веднаш да им кажам дека тоа нема да им успее, а ние го почитуваме КФОР и веруваме дека ќе си ја заврши својата работа“, додаде Вучиќ.
По интервенцијата на полицијата во Белград, функционирањето на железничкиот сообраќај, кој беше блокиран од демонстрантите против експлоатацијата на борот и литиумот во Србија, продолжи на двете белградски железнички станици Прокоп и Нов Белград.
Потпретседателот на Владата на Република Србија и министер за внатрешни работи, Ивица Дачиќ, на прес-конференцијата изјави дека Министерството за внатрешни работи овозможило непречено одвивање на железничкиот сообраќај без принуда и сила, и дека никој не бил повреден.
„Вкупно 14 лица се приведени поради постоење на основано сомнение дека сториле кривични дела, три поради сомнение за сторени прекршоци и две лица кои се странски државјани, поради присуство во текот на протестот во близина на најважните државни институции,“ рече Дачиќ.
Тој истакна дека полицијата работи на откривање на учесниците и најави дека против сите извршители ќе поднесе пријави.
