СОЛУН (АА) - Министрите за надворешни работи, внатрешни работи и за енергетика на Грција, Македонија, Албанија и на Бугарија се состанаа во грчкиот град Солун, каде што ќе разговараат околу соработката во областите безбедност, гранично управување и енергетика, јавува Anadolu Agency (AA).
На четиристраниот состанок учествуваат: од Грција – министерот за надворешни работи, Никос Коѕијас, заменик-министерот за јавен ред и заштита на граѓаните, Никос Тоскас, и генералниот секретар на Министерството за енергетика, Михалис Вериопулос; од Македонија – министерот за надворешни работи, Никола Димитров, министерот за внатрешни работи, Оливер Спасовски и министерот за економија, Крешник Бектеши; од Албанија – министерот за надворешни работи, Дитмир Бушати, министерката за внатрешни работи, Ровена Вода и министерот за енергетика и индустрија, Коли Беле; од Бугарија – министерката за надворешни работи, Екатерина Захариева, министерот за внатрешни работи, Валентин Радев и министерот за енергетика, Росен Симитчиев.
Грчкиот министер за надворешни работи, Коѕијас, во својот говор на почетокот од состанокот истакна дека министрите од четирите земји по вторпат се состануваат во Солун. „На овие состаноци, ние искрено разговараме за мислењата во врска со решавањето на проблемите и за иднината“, рече тој.
Според соопштеното, на состанокот се дискутира на темите безбедност, прекугранична соработка, шумски пожари и енергетика.
Коѕијас истакна дека ќе се дискутира и околу енергетиката: „На овој состанок меѓу нас се и министрите за енергетика. Соработката во оваа област е исклучително важна поради тоа што нашиот регион се наоѓа на рутата на гасоводот“, рече тој.
Министрите за надворешни и за внатрешни работи на четирите земји, на иницијатива на Коѕијас се состанаа и во април 2016 година, во Солун.
