ПРИШТИНА (АА) ‒ Пратениците во Собранието на Косово денеска ја усвоија Резолуцијата за поддршка на Украина и на нејзиниот народ во отпорот кон руската агресија. За Резолуцијата гласаа 94 присутни пратеници, немаше против ниту воздржани, но во текот на гласањето во салата не беа пратениците на Српската листа, јавува Агенција Анадолија (АА).
Текстот на Резолуцијата пред седницата го усогласија сите пратенички групи, освен Српската листа, на која, според зборовите на Игор Симиќ, шефот на таа пратеничка група, текстот не ѝ бил воопшто проследен. Пратениците седницата ја започнаа со минута молк за цивилните жртви на војната во Украина, а потоа ги истакнаа транспарентите во боите на украинското знаме на кои пишуваше „Ние сме со Украина“. Претседателот на Собранието на Косово, Глаук Коњуфца, го прочита текстот на Резолуцијата.
„Собранието на Косово на најостар начин ја осудува противправната, нeиспровоцирана и неоправдана воена агресија и инвазија на Руската Федерација врз Украина, како и вмешаноста на Белорусија во оваа агресија“, се наведува, меѓу другото, во Резолуцијата.
Се истакнува дека Собранието на Косово е помеѓу западните сојузници во поддршката кон Украина и нејзиниот народ.
Собранието бара од Владата, покрај подготвеноста да прими 20 украински новинари, да ги координира сите понатамошни акции со меѓународните партнери, како и да изрази подготвеност за евентуално сместување до 5.000 бегалци од Украина. Исто така, се бара од Владата да издвои посебен фонд за помош на украинскиот народ во согласност и во координација помеѓу владите на Косово и Украина.
Премиерот на Косово, Албин Курти, рече дека пред она што ѝ се случува на Украина никој не може да остане индиферентен, бидејќи нападот на Украина е напад на цивилизираниот свет. Курти рече дека она што им се случува на Украинците, потсетува на она што го доживеал народот на Косово, и дека Косово силно ја осудува агресијата на Русија врз Украина.
„Го осудуваме и ставот за руската агресија од нашиот северен сосед Србија и невоведувањето санкции. Позицијата и-и, во обид да игра и со Москва и со Брисел, и со Вашингтон и со Пекинг, е позиција и со автократија и со демократија. Но, кон руската агресија и окупација на Украина, не може да има неутралност за земји кандидати за членство во Европската Унија“, рече Курти.
Пратеникот и претседател на Демократската партија на Косово, Мемли Красниќи, изјави дека во Украина се брани повеќе од суверенитетот на државата. Тој рече дека во Украина веќе осум дена се бранат сите човекови вредности на слобода, мир и правда, а на тие вредности се темели и Косово.
„Со оваа резолуција Косово го формализира своето право и правилно усогласување на европските и светските демократии, со спротивставување, осудување и отфрлање на логиката на воената агресија против демократскиот поредок, суверенитетот на една демократска земја и демократски вредности врз кои се заснова слободата на една земја“, рече Красниќи.
Пратеникот и претседател на Демократскиот сојуз на Косово, Лумир Абдиџику, рече дека Косово застанало на страната на демократскиот свет во ситуацијата создадена кон Украина. Тој рече дека Косово како мала земја не може да влијае на случувањата од големи размери, но тие случувања можат да влијаат на неа. Абдиџику истакна дека Косово ги познава тенденциите на единствената проруска држава во Европа, Србија.
„Нашиот северен сосед ќе остане на мрачната страна на историјата како еден поддржувач на руската агресија. Одбивањето на земја кандидат за членство во ЕУ да се усогласи со надворешната безбедносна политика на истата ЕУ, повеќе е показател за меѓународната заедница отколку за нас дека постои дестабилизирачка држава во регионот“, рече Абдиџику.
Игор Симиќ, шефот на пратеничката група Српска листа, нагласи дека Србија вчера во Генералното собрание на Обединетите нации гласала за Резолуцијата со која јасно се „осудил упадот во Украина и сите насилни случувања кои се случија таму“. Симиќ рече дека српските пратеници не го добија предлогот на Резолуцијата за која денеска се гласа. Тој апелира на политичките претставници да бираат зборови и да внимаваат со своите неодговорни изјави за да не ги зголемуваат тензиите и да не го загрозуваат мирот на овие простори.
„Балканот мора да остане надвор од сите случувања, бидејќи конечно мора да сфатиме дека мирот нема цена, дека нашите граѓани не сакаат тензии, судири, туку просперитет за себе, своето семејство и децата, за да се продолжи со економско зајакнување на Балканот и иднината“, изјави Симиќ.
Додаде дека Србија и српскиот народ се против страдањата на невиниот народ, без оглед на нацијата, верата или јазикот.
Шефицата на пратеничката група на Движењето „Самоопределување“, Мимоза Кусари Лила, рече дека Собранието ќе пружи безрезервна поддршка на Украина.
„Додека ние овде разговараме, во Украина се водат борби. Руската агресија се води по истото сценарио, како Слободан Милошевиќ на Балканот“, рече таа.
