СКОПЈЕ (АА) - Меѓународниот Балкански Универзитет (ИБУ) во Скопје со свечена церемонија го одбележа почетокот на новата академска година 2023/24, јавува Анадолу.
На церемонијата, освен претставници на ИБУ, присуствуваа претседателот на Северна Македонија, Стево Пендаровски, заменик министерот за Образование, Агим Нухиу, амбасадорот на Туркије во Северна Македонија, Хасан Мехмет Секизќок, претставници на локалната власт, невладини организации и голем број студенти.
Во својот говор, претседателот Пендаровски истакна дека во 17-те години од постоењето, ИБУ во континуитет бележи нагорна линија во својот развој.
„Според мене, посебна додадена вредност на оваа институција е што наставата се одвива на повеќе јазици, затоа што сум длабоко убеден дека еден мултиетнички и мултикултурен амбиент подобро ги подготвува студентите за светот кој е глобализиран, особено во научно-истражувачкиот сегмент“, рече Пендаровски.
Тој ги повика студентите да се трудат да стекнат што повеќе знаење, нагласувајќи дека знаењето и младешката енергија се неопходни за развојот на државата.
Пендаровски ја изрази и својата почит за професорите, истакнувајќи дека и тој самиот бил, и ќе биде професор.
„Дозволете на самиот крај на сите да ви посакам добро здравје, среќа и успех, а на студентите во сите години, студии исполнети со интересни содржини и стекнување на нови знаења и вештини кои од вас ќе направат подобри луѓе“, рече Пендаровски, при тоа посакувајќи успешна академска година и на турски, албански и англиски јазик.
- „Да знаете и да бидете трпеливи, без сомнение ќе ја добиете наградата за вашиот труд“ -
Амбасадорот на Туркије во Северна Македонија, Хасан Мехмет Секизќок, во својот говор рече дека со задоволство е следено како ИБУ, формирана под покровителство на претседателот Реџеп Таип Ердоган, презема решителни чекори кон целта, со континуирани иновации во областа на образованието, едукацијата, истражувањето и развојот.
Наведувајќи дека земјите кои инвестираат во образованието се земји кои се истакнуваат и прават разлика во економскиот развој, Секизќок во своето обраќање пред студентите рече:
„Треба постојано да надградите нови работи над знаењето што го добивте на универзитетот. Да не заборавиме дека не само образовните институции, туку секое место е училница. Секаде каде што има живот, се изучуваат лекции. Задолжително користете разум кога ги користите стекнатите искуства. Да се стремиме да бидеме поединци кои секогаш размислуваат, дијалогираат, дискутираат и создаваат навика за самокритичност. Да обрнеме внимание на социјалната солидарност и да ја ставиме човечката љубов во центарот на нашите животи. Да знаете и да бидете трпеливи, без сомнение ќе ја добиете наградата за вашиот труд.“
Амбасадорот исто така рече дека се среќни што ја отвораат Стоматолошката клиника ИБУ-Дент при Стоматолошкиот факултет на овој Универзитет.
- „Во ИБУ ги подготвуваме студентите да го обликуваат светот на утрешнината“ -
Ректорот на ИБУ, Лутфи Сунар, го изрази своето задоволство што универзитетот продолжува со својот развој, со речиси 200 професори и околу 4.000 студенти на седум факултети.
„Светот околу брзо се развива, а со тоа и предизвиците со кои се соочуваме. Сепак, нашата непоколеблива посветеност на образованието, истражувањето и иновациите ни овозможува да се движиме низ овие предизвици и да ги претвориме во можности. На ИБУ, ние не само што ги подготвуваме студентите за светот на денешницата, туку ги опремуваме со вештини, знаења и вредности што им се потребни за да го обликуваат светот на утрешнината“, рече Сунар.
Тој исто така рече дека ИБУ одигра важна улога во зајакнувањето на врските меѓу Северна Македонија и Туркије, симболизирајќи го пријателството и меѓусебното почитување.
Обраќајќи им се на новите студенти, тој им порача дека сега е нивен ред да учат, откриваат, иновираат и да направат разлика.
