Admir Fazlagic
21 Октомври 2020•Ажурирај: 22 Октомври 2020
СКОПЈЕ
Во Воената академија „Генерал Михаило Апостолски“ во Скопје денеска се одржа свеченост по повод промоцијата на потпоручниците и заклетвата на питомците од Воената академија, пренесува Агенција Анадолија (АА).
Како што соопшти Министерството за одбрана на Северна Македонија, на свеченоста, заклетва дадоа 40 питомци од 24. класа на Академијата кои ќе го започнат военото образование. Од нив, 25 се од Северна Македонија, осуммина од Црна Гора, шест од Босна и Херцеговина и еден од Косово.
Во првиот офицерски чин, потпоручник, промовирани се 27 питомци од 20. класа кои го завршуваат своето воено образование на Академијата. Од нив, 19 се од Северна Македонија, тројца од Црна Гора, четворица од Босна и Херцеговина и еден од Косово.
На свеченоста свое обраќање имаше министерката за одбрана на Северна Македонија, Радмила Шекеринска, која на овие две класи им честиташе, на, како што рече, тоа што одбрале професија, за која истакна дека е високо ценета, угледна и благородна, и изрази убеденост дека со својата работа сегашните и идните офицери ќе ја заслужат високата доверба која ја имаат граѓаните во Армијата.
„Дваесеттата класа питомци кои денеска го добиваат својот прв офицерски чин покажа колкава е вредноста на Воената академија не само за нас, туку и за нашиот регион, а преку нашиот регион и за НАТО-Алијансата. Триесетина проценти од оваа класа се школувани за потребите на вооружените сили на регионот“, рече Шекеринска.
Таа на потпоручниците им порача дека во изминатиот период беа направени големи чекори напред и дека во Северна Македонија во тек се суштински процеси за опремување, трансформација и модернизација.
На новопримените 40 питомци, кои се и првата класа кои го започнуваат военото образовани во Северна Македонија како полноправна членка на НАТО, министерката Шекеринска им порача дека во следните четири години ќе ја научат тежината и одговорноста, но и благородноста на униформата.
На свеченоста беа наградени тројцата прворангирани потпоручници, Биљана Дуловиќ од Црна Гора и Гоце Софески и Филип Младеновски од Северна Македонија, а плакета им беше доделена и на професорите на Воената академија кои годинава заминуваат во пензија.
