Северна Македонија: Институтот „Јунус Емре“ организираше семинари за обука на наставниците по турски јазик

СКОПЈЕ (АА) – Институтот „Јунус Емре“ во Скопје со поддршка на Амбасадата на Република Турција во Скопје и во партнерство со Министерството за образование на Северна Македонија организираше семинари за обука на наставниците по турски јазик и работилница за „Турски јазик“, јавува Агенција Анадолија (АА).

Семинарите за обука на наставниците по турски јазик се одржаа во градовите Скопје, Струга и Струмица помеѓу 16-18 август 2021 година.

Во оваа прилика, денес во Скопје се одржа церемонија за затворање на семинарите за обука на наставниците по турски јазик, на која присуствуваа Арафат Шабани, заменик-министерот за образование и наука на Северна Македонија, проф. д-р Јавуз Карталиоглу, директорот за настава на турски јазик и туркологија при Институтот „Јунус Емре“, Серхат Кула, директорот на Институтот „Јунус Емре“ во Скопје, Халим Омер Согут, координаторот на ТИКА во Скопје, Мустафа Дилиоглу, директорот на Фондацијата „Маариф“ во Северна Македонија, професори од Катедрата за турски јазик при Филолошкиот факултет во Скопје и наставници по турски јазик.

Покрај семинарите за обука на наставниците по турски јазик, денес во Скопје се одржува и работилница за „Турски јазик“.

Заменик-министерот за образование и наука на Северна Македонија, Шабани, истакна дека денес на работилницата за „Турски јазик“ од научна перспектива ќе бидат презентирани проблемите на турското образование во Северна Македонија, вклучувајќи ги вкупно 65-те основни училишта и 13 средни училишта.

„Се надевам дека на оваа работилница најпрвин ќе се дискутираат проблемите во турското образование на среден и долг рок и ќе се презентираат и понудат решенија за тие проблеми“, нагласи Шабани, наведувајќи дека работилницата има поголемо значење бидејќи се одржува во партнерство со Министерството за образование и наука на Северна Македонија и Институтот „Јунус Емре“.

Директорот за настава на турски јазик и туркологија на Институтот „Јунус Емре“, проф. д-р Јавуз Карталиоглу, во изјавата за медиумите истакна дека на семинарите за обука на наставниците по турски јазик одржани во Скопје, Струга и Струмица учествувале околу 100 наставници.

„Од понеделник, заедно со пет експерти по турски јазик одржуваме различни обуки на наставниците кои предаваат турски јазик низ цела [Северна] Македонија, со цел да го зголемиме нивниот професионален развој и да ги оптимизираме нивните професионални компетенции“, нагласи професор Карталиоглу.

Директорот на Институтот „Јунус Емре“ во Скопје, Серхат Кула, потсети дека Институтот за време на 11-годишното работење во Северна Македонија одржал курсеви на турски јазик за повеќе од 5 илјади лица.

Кула, исто така, истакна дека по 3-дневниот семинар за обука на наставниците по турски јазик денес во Скопје се одржува и работилница за „Турски јазик“ на која ќе учествуваат универзитетски професори од овој регион, директори на училишта, како и заменик-министерот за образование и наука на Северна Македонија.

„Во рамките на оваа работилница набљудувани ќе бидат потребите на турскиот јазик во регионот, всушност ќе направивме рендген. Исто така, на денешната работилница во Скопје сакаме да ги оцениме и прашањата за кои разговаравме за време на семинарите одржани во регионот“, рече Серхат Кула.