БЕЛГРАД (АА) - Ако дојде до тоа Косово да биде или не во Обединетите нации, за мене како претседател Уставот е свето писмо, капитулацијата и предавањето не се опции, и јас знам што ќе направам, бидејќи не постои избор Вучиќ или Србија, изјави денеска српскиот претседател Александар Вучиќ на специјалната седница на Народното собрание на Република Србија на која се презентира извештајот за преговорите со Приштина во периодот од 1 септември до 15 јануари, јавува Анадолу.
„Не постои избор Вучиќ или Србија. Србија е важна, ќе бидам секогаш на страната на Србија, Вучиќ не е важен“, рече Вучиќ во обраќањето пред пратениците во Народното собрание, пред кои го презентира планот од 10 точки во однос на приоритетите на дејствувањето на српските власти.
Истакна дека националната структура на Косово е променета и дека на тоа подрачје има околу 26 отсто Срби, дека се сменети и геополитичките околности, политичкиот моментум и политичката рамка за кои денеска се говори во рамките на планот за Косово.
„Мирот и стабилноста по секоја цена, формирањето на Заедницата на српски општини, безбедност и подобар живот за Србите на Косово се меѓу приоритетите на властите на Србија“, истакна Вучиќ.
„За разлика од оние кои сакаат да извикуваат слогани, јас реков дека Србија ќе разговара, дури и за најлошите документи, бидејќи Србија нема право да го повтори искуството од минатото“, рече Вучиќ.
Тој истакна дека Србија се бори за мир за да се осигура безбедноста на Србите на Косово, бидејќи во спротивно „тие први би настрадале“.
Вучиќ порача дека задржувањето на воената неутралност, изградбата на силна армија и зачувувањето на независноста во одлучувањето, без мешање од Исток и од Запад, се меѓу виталните и национални интереси на Србија.
„Наш животно важен интерес е да останеме на европскиот пат... затоа што тој пат значи и инвестиции, и стандард, и плати и пензии... Тој пат ни е потребен затоа што денес живееме во поинаква реалност. Земјите од опкружувањето се или во НАТО или НАТО е таму“, рече Вучиќ, наведувајќи дека Босна и Херцеговина не е членка на НАТО, но дека „НАТО е таму“, како и дека НАТО е и на Косово, а останатите околни земји се членки.
Потврди дека 90 отсто од содржината на европскиот план за решавање на косовското прашање што се појавил во јавноста е точна, и укажа дека во точката 4 стои дека Србија нема да се противи на членството на Косово во ниту една меѓународна организација.
„И да се противиме и да не се противиме, за [влез на Косово во] Советот на Европа, НАТО, ЕУ, тие ќе имаат мнозинство кога тие тоа ќе го одлучат“, рече Вучиќ.
Наведе дека во однос на Заедницата на српски општини е договорено да се оди со она што е обврска од Бриселскиот договор, но дека косовската страна тоа не го сака. Тој истакна дека упорното истрајување во формирањето на Заедницата мора да биде и правната и физичката рамка.
Нагласи дека во следните неколку месеци политиката на Србија ќе биде по секоја цена да ги зачува мирот и стабилноста.
„Да се воздржиме и да не одговараме на провокациите, освен ако не се загрозени животите и имотот на луѓето, како во 2004 година. Мирот и стабилноста не се само парола, тоа е нешто што враќа и носи живот во Србија, тоа е нешто што ни овозможува да го зачуваме биолошкиот опстанок на нашиот народ“, рече Вучиќ.
Наведе дека Србија ќе се посвети на растот, што го подразбира здравството, енергетиката и областа на храната.
Претседателот на Србија рече дека е важно преговорите да продолжат бидејќи во спротивно Србија би останала целосно изолирана, „а сами не можете да функционирате во современиот свет“. Напомена дека на Србија ѝ се потребни инвестиции, фабрики, научни центри... Најави дека просечната плата во Србија во наредниот период ќе надмине илјада евра, со што ќе ги надмине некои земји од ЕУ, и изрази уверување дека Србија ќе го задржи растот од околу 2 отсто.
„Се наоѓаме во тежок и многу деликатен момент“, рече српскиот претседател, додавајќи дека „мора да водиме сметка за народот на Косово и Метохија, и истовремено за виталните и националните интереси на Србија“.
Упати критики до парламентарните групи кои го одбија неговиот претходен повик за консултации за Косово.
Вучиќ, реакциите на претставниците на опозициските партии пред и за време на излагањето, кои во повеќе наврати го прекинуваа со вербални упади, ги нарече „циркуска претстава“, а транспарентите истакнати во салата ги нарече „имбецилни“.
„На еден од транспарентите пишуваше: „Предавник!“ - „Дали мислевте на себе?“, праша Вучиќ, што беше проследено со аплауз.
Излагањето го заврши со зборовите: „Да живее Србија! Предавањето не е опција!“
