Премиерот на Северна Македонија, Зоран Заев, во Грција се состана со Алексис Ципрас
Лидерот на Сириза и поранешен премиер на Грција, Ципрас, ја потенцира силната поддршка за Северна Македонија за почеток на преговорите за членство со Европската Унија
СКОПЈЕ
Премиерот на Северна Македонија, Зоран Заев, во рамки на посетата на грчкиот главен град Атина се состана со поранешниот премиер на Грција и актуелен лидер на политичката партија Сириза, Алексис Ципрас, пренесува Агенција Анадолија (АА).
Според соопштението на Владата на Северна Македонија, Заев бил придружуван од страна на вицепремиерите за европски и за економски прашања, Никола Димитров и Фатмир Битиќи.
„Заев и Ципрас изразија задоволство што Договорот од Преспа е силно признаен, препознаен и поддржан од сите чинители во регионот, Европа и пошироко, и што на него се гледа како пример за решавање спорови меѓу други држави“, се вели во соопштението.
Според соопштението, на средбата било нагласено дека денес придобивките од Договорот ги препознаваат и политичките чинители кои од различни причини пред три години се сомневале и не верувале во него.
„Лидерот на Сириза и поранешен премиер на Грција, Ципрас, ја потенцира силната поддршка за Северна Македонија за почеток на преговорите за членство со Европската Унија и порача дека ќе го вложи целиот сопствен капацитет и капацитетот на неговата партија да ја поддржи Северна Македонија во остварувањето на оваа стратешка цел“, се додава во ова соопштение.
Заев и Ципрас се согласни дека ЕУ треба да го исполни ветувањето, кон земјите како Северна Македонија кои покажаа сериозни резултати на европскиот пат и со тоа да се оневозможат нови политички засилувања на националистичките и деструктивните политички чинители на Западен Балкан и во Европа.