Потпишани законите за ратификација на спогодбите за отворање два нови гранични премини со Грција

СКОПЈЕ (АА) - Претседателот на Република Северна Македонија, Стево Пендаровски, денеска ги потпиша указите за прогласување на Законот за ратификација на Спогодбата меѓу Република Северна Македонија и Република Грција за отворање нов граничен премин меѓу двете земји, кој ќе ги поврзува Мајден во Република Северна Македонија и Промахoи во Република Грција, и на Законот за ратификација на Спогодбата меѓу Република Северна Македонија и Република Грција за отворање на еден граничен премин во регионот на Преспанското Езеро, пренесува Anadolu Agency (AA).

„Претседателот Пендаровски смета дека отворањето на Граничниот премин „Мајден – Промахои“ и Граничниот премин „Маркова Нога – Лемос“ меѓу Република Северна Македонија и Република Грција, ќе придонесе за натамошен развој на севкупните билатерални односи меѓу двете држави, ќе придонесе за развој на прекуграничната соработка и ќе ја олесни комуникацијата на населението што живее во регионот на двата гранични премини“, се вели во соопштението од Кабинетот на претседателот Пендаровски.

Се додава дека претседателот Пендаровски очекува од надлежните институции да дадат максимален придонес за реализација на предвидените активности и за што поскоро отворање на двата гранични премини.