Admir Fazlagic
03 Јануари 2021•Ажурирај: 03 Јануари 2021
СТРУМИЦА
Пожарот кој избувна во приземјето на Трговскиот центар „Глобал“ во Струмица и се прошири и во внатрешноста на објектот, по неколкучасовни напори пожарникарите успеаа да го стават под контрола, јавува Агенција Анадолија (АА).
Речиси пред полноќ граѓаните до надлежните служби во Струмица пријавиле дека се крева пламен во близина на трговскиот центар „Глобал", после што на лице место се најдоа пожарникарите кои неколку часа се обидуваа да го гасат пожарот кој се ширеше во внатрешноста на објектот.
Струмичкиот градоначалник Коста Јаневски, кој беше на местото на настанот изјави дека од пожарот е причинета огромна материјална штета. Тој истакна дека пожарникарите прават се за да спасат она што може да се спаси. Според него, „среќа во несреќата е тоа што нема човечки жртви."
Тој додаде дека пожарникарите вложуваат огромни напори и дека на помош на струмичките пожарникари пристигнале екипи и од околните градови, меѓу кои екипа од Радовиш, Штип, Неготино и Валандово.
На местото на пожарот беа голем број граѓани, а повеќе полициски возила го обезбедуваат просторот околу трговскиот центар „Глобал“, како и возила на првата помош.
Сѐ уште нема податоци од надлежните за можните причини за предизвикување на пожарот.
