Zylfije Adem Jakupi
16 Февруари 2023•Ажурирај: 17 Февруари 2023
ПРИШТИНА (АА) - Косовската претседателка Вјоса Османи денеска го прими претседателот на Албанија, Бајрам Бегај, кој престојува во Косово за да учествува на прославата на 15-годишнината од независноста на Косово, 17 Февруари, пренесува Анадолу.
Бегај на Османи и на граѓаните на Косово им ја честита 15-годишнината од независноста и посочи дека Албанија секогаш ќе биде со Косово, придонесувајќи за зајакнување на неговата меѓународна позиција.
Османи истакна дека Косово ја слави 15-годишнината од својата државност соочено со предизвиците, но решено да оди напред во зајакнувањето на државата и посветено на евроатлантскиот пат.
„На 15-годишнината од независноста, со почит се сеќаваме на сите кои придонесоа за слободата, независноста и градењето на државата, од архитектот на државата Косово, историскиот претседател д-р Ибрахим Ругова до ќерките и синовите на ОВК, на чело со легендарниот командант Адем Јашари, од кои многумина херојски се бореа за слободата и Републиката“, нагласи Османи.
Лидерите, односите меѓу Косово и Албанија ги оценија не само како пријателски, туку и братски, и ветија дека ќе се посветат на нивно интензивирање.
Во овој контекст, Османи ја истакна потребата од натамошна координација и усогласување, особено на полето на надворешната политика и ја истакна потребата Албанија да биде силен глас за Косово во институциите каде што Косово во моментов нема свои претставници.
Беше констатирано и дека Косово и Албанија се заеднички ангажирани и посветени на заштитата на демократијата, мирот и слободата и дека стабилноста на регионот е од витално значење за двете земји да го продолжат својот европски пат.
