Alma Dekovic
30 Октомври 2024•Ажурирај: 31 Октомври 2024
САРАЕВО (АА) - Претседателот на Црна Гора, Јаков Милатовиќ, денеска во Сараево рече дека неговата посета на главниот град на Босна и Херцеговина е знак за континуитетот на пријателските односи меѓу двете земји, јавува Анадолу.
На почетокот на своето обраќање, Милатовиќ изрази сочувство до семејствата на жртвите од неодамнешните поплави во Босна и Херцеговина.
Тој рече дека добрососедската соработка која се темели на меѓусебно почитување, доверба и почит е императив на надворешната политика на Црна Гора.
„Добрососедската соработка е еден од трите главни надворешно-политички приоритети на Црна Гора, покрај нашето кредибилно членство во НАТО алијансата и забрзувањето на нашиот европски пат, и се осмелувам да кажам можеби најважниот приоритет поради минатото кое заеднички го делиме и сигурен сум во иднината која заеднички ја имаме“, изјави Милатовиќ.
Тој додаде дека клучните аспекти на соработката меѓу БиХ и Црна Гора се однесуваат на инвестициите во инфраструктурните проекти со цел поефикасно поврзување на двете земји.
„Дојдов од Подгорица синоќа преку Шќепан Поље и можам само да изразам чувство на тага за состојбата на патот Сараево-Подгорица. Истовремено, сакам да изразам чувство на радост што во изминатите неколку години се направени некои чекори во вистинската насока во однос на подобрување на патниот правец. Сите овде да нѐ потсетам дека Сараево и Подгорица во географска смисла се двата најблиски главни града во регионот, оддалечени околу 170 километри, но за жал кога го поминувате тој патен правец од Сараево до Подгорица, тоа не изгледа така“, рече Милатовиќ.
Црногорскиот претседател рече дека изградбата на заедничкиот мост на реката Тара е важен чекор во обновата на патниот правец меѓу Сараево и Подгорица.
Милатовиќ додаде дека дополнително унапредување на економската соработка е важно за Босна и Херцеговина и Црна Гора.
„Црна Гора е заинтересирана за изградба на железница која би ги поврзала Чапљина и Никшиќ и со тоа дополнително би го ставила во функција и пристаништето Бар за економијата на БиХ. Исто така, важен приоритет на инфраструктурното поврзување меѓу Босна и Херцеговина и Црна Гора е изградбата на Јадранско-јонскиот автопат, еден од приоритетите на Црна Гора“, рече Милатовиќ.
Тој додаде дека Босна и Херцеговина и Црна Гора дополнително ги поврзува и европската интеграција.
„Црна Гора одлучно тргна на патот на реформите со јасна визија и јасна цел да стане 28-та земја членка на ЕУ во 2028 година. И Босна и Херцеговина го започна својот европски пат и тоа, како добар сосед, вистински нѐ радува“, рече Милатовиќ, честитајќи ѝ на Босна и Херцеговина за отворањето на поглавјето.
Тој изрази надеж дека во Црна Гора е созреана политичката свест за неопходноста од дополнителни реформски напори, сѐ во светло на заокружување на европскиот пат на земјата.
„Доколку Црна Гора стане нова земја членка на ЕУ во 2028 година, тоа би било добар пример, пред сѐ за јавноста во сите земји од регионот, дека процесот на проширување е жив. Знаете дека јавноста во некои земји од регионот станува малку скептична кога е во прашање иднината на Европа. Токму примерот на Црна Гора и нејзиното членство може да им покаже на сите скептици дека процесот на пристапување е жив, дека тоа се случува, и дека можеме на овој начин да им покажеме на сите земји. Дали тоа ќе се случи во 2028 година? Мислам дека во моментов постои добар момент во Брисел, мораме да го искористиме. Велат дека земјите од нашиот регион се најдобри во пропуштањето добри можности. Искрено се надевам дека овојпат тоа нема да биде случај и дека Црна Гора со својот пример ќе даде добар пример и на другите земји од регионот“, порача Милатовиќ.
