САРАЕВО (АА) – ВЕСНА БЕШИЌ -
Неколку стотици масакри се извршени во Босна и Херцеговина во текот на војната од 1992 до 1995 година. Извршени се на различни подрачја, а за голем број од нив одговорните не се процесуирани и не одговараа за смртта на голем број луѓе, пишува Анадолу.
Опсадата на Сараево започна на 5 април 1992 година, а заврши на 29 февруари 1996 година. Траеше 1.425 дена.
За тоа време, околу 350.000 жители се секојдневно изложени на оган од припадниците на поранешната ЈНА и паравоените формации, а подоцна и од Војската на Република Српска, од речиси сите видови оружје, од позициите лоцирани на околните ридови. Тие не успеаја да се спуштат и да го заземат градот само благодарение на големата волја, желба и напорите на бранителите, и на граѓаните кои се одзваа на повикот за одбрана, на почетокот речиси со голи раце, во патики и фармерки, со минимално вооружување, и застанаа како бедем на градот.
Во текот на опсадата загинаа 11.541 граѓанин на Сараево, меѓу кои 1.601 дете, а над 50.000 цивили беа полесно или потешко ранети.
Цел на нападите беа луѓето кои купуваа на пазарот, чекаа ред за вода и леб и децата кои си играа во училишните дворови или пред зградите.
Се проценува дека за време на опсадата кон Сараево биле истрелани околу 500.000 проектили, додека на 22 јули 1993 година врз градот биле истрелани рекордни 3.777 проектили. Врз градот дневно во просек паѓале 329 гранати.
Меѓу најбруталните масакри што се случија во опколеното Сараево беа оние на пазарот Маркале.
Првиот од двата масакри на пазарот Маркале, во центарот на Сараево, се случи на 5 февруари 1994 година, помеѓу 12:10 и 12:20 часот, кога од позициите на агресорот што беше на подрачјето на Мрковиќ, истрелана е минофрлачка граната со калибар од 120 милиметри.
Гранатата падна на преполниот пазар при што загинаа 68 граѓани, додека 142 беа потешко и полесно ранети.
Вториот масакр се случи на 28 август 1995 година. Од гранатата истрелана од позициите на силите под контрола на Војската на Република Српска (ВРС) загинаа 43 цивили на сараевскиот пазар Маркале, од кои три деца, додека 84 се полесно и потешко ранети.
Минофрлачката граната истрелана од позициите на агресорот од правец на Требевиќ експлодира кај северниот влез на Градскиот пазар во Сараево во 1995 година, со што српските воени, полициски и паравоени формации извршија уште едно во низата ужасни злосторства во војната што се водеше во Босна и Херцеговина од 1992 година до потпишувањето на Дејтонскиот мировен договор во ноември 1995 година.
Радован Караџиќ, поранешниот претседател на Република Српска, пред Механизмот за меѓународни кривични судови беше правосилно осуден во март 2019 година на доживотен затвор, меѓу другото, и за тероризирање и гранатирање на граѓаните на Сараево, што е исто така една од точките за која на доживотен затвор во јуни минатата година е осуден и Ратко Младиќ, командант на Главниот штаб на Војската на Република Српска.
За убиството на 68 граѓани на Сараево и ранувањето на 142 од нив осуден е и командантот на Сараевско-романискиот корпус, Станислав Галиќ. Во 2009 година, Хашкиот трибунал го осуди и Драгомир Милошевиќ на 29 години затвор за терор над цивилите во Сараево.
Масакрот на децата во улицата Бакарева во Бистрик се случи во 1993 година. Тој ден од граната испукана од српските позиции во околината на Сараево загинаа седум деца.
Значајно е да се спомене и масакрот на гробиштата во Будаковиќи што се случи во 1993 година, кога од граната испукана од српските позиции загинаа десет, а беa ранети тројца граѓани на Сараево.
Во Добриња имаше неколку масакри извршени врз цивили во оваа сараевска населба за време на војната во Босна и Херцеговина.
Првиот масакр се случи во 1993 година во населбата Добриња III, кога од две минофрлачки гранати истрелани од српските позиции на место меѓу улицата Град Баку и Плоштадот на децата на Добриња загинаа 15 цивили, а 80 цивили, главно деца, беа ранети.
Гранатите се истрелани на местото каде што се одржуваше Бајрамски турнир во мал фудбал.
Вториот масакр во Добриња се случи во 1993 година на улицата Хакија Турајлиќ бр. 37, кога од минофрлачка граната истрелана од српските позиции врз луѓе кои чекале ред за вода загинаа 13 цивили, а 15 се ранети.
Масакрот во Ферхадија или масакрот во улицата Васе Мискин е еден од најстрашните злосторства во историјата на Сараево, што се случи на 27 мај 1992 година, врз цивили кои чекаа ред за леб на главната улица во Сараево.
Српските сили истрелаа три гранати од правец на Борија, и усмртија 26, а ранија 108 граѓани на Сараево.
Масакрот во улицата Халачи на Башчаршија во Сараево се случи во август 1992 година за време на опсадата на Сараево. Од гранатата истрелана од српските позиции загинаа осум, а потешко се ранети тројца цивили.
Масакр во септември 1992 година се случи и во сараевската населба Бољаков Поток, во Општина Нови Град Сараево. Од гранатата истрелана од српските позиции загинаа девет цивили кои се собраа на погреб на локалните гробишта, а 20 беа потешко или полесно ранети.
Масакри се случија и на Алипашино Поле. Првиот, на 30 август 1992 година, на Плоштадот на солидарноста број 14 (пазар), каде што загинаа 11 цивили.
Вториот се случи на 22 јануари 1994 година. Со три гранати усмртени се шест деца.
